Վանաձորում ֆուտբոլի մարզադաշտը կվերակառուցվի ՈՒԵՖԱ-ի ստանդարտներին համապատասխան

Գործադիրը սահմանել է, որ Հայաստանի Հանրապետության պետական բյուջեի «1163. Մասսայական սպորտ» ծրագրի «32006․ Ֆուտբոլի ենթակառուցվածքների զարգացման նպատակով մարզադաշտերի և մարզադպրոցների կառուցում» միջոցառման շրջանակներում Հայաստանի Հանրապետության քաղաքաշինության կոմիտեին վերապահված՝ Վանաձորում ՈՒԵՖԱ ստանդարտներով ֆուտբոլի մարզադաշտի կառուցման/վերակառուցման համար անհրաժեշտ նախագծանախահաշվային փաստաթղթերի մշակման ծառայության գնման պահանջը համարվում է անհետաձգելի: Որոշումն ընդունվել է կառավարության այսօրվա նիստում։

Ըստ կառավարության՝ որոշման արդյունքում հնարավոր կլինի հրատապ կարգով մեկնարկել Վանաձորում ՈՒԵՖԱ ստանդարտներով ֆուտբոլի մարզադաշտի կառուցման/վերակառուցման նախագծանախահաշվային փաստաթղթերի մշակումը՝ երաշխավորելով ծրագրի ավարտը մինչև 2029 թվականի հունվարը՝ Հայաստանում  կայանալիք ֆուտբոլի աշխարհի 2029 թ. երիտասարդական առաջնությանն ընդառաջ:

Հիշեցնենք, որ Հայաստանի և Վրաստանի ֆուտբոլի ֆեդերացիաները հայտ են ներկայացրել ՖԻՖԱ՝ մինչև 20 տարեկանների Աշխարհի 2029 թվականի առաջնությունը երկու երկրներում համատեղ անցկացնելու համար:

2023 թվականի դեկտեմբերի 7-ին Կառավարությունն ընդունեց որոշում։ Ըստ դրա՝ Ֆիզիկական կուլտուրայի և սպորտի ոլորտների 2024-2030 թթ. Ռազմավարության համաձայն՝ մինչև 2030 թվականը Հայաստանում պետք է կառուցվի ՈւԵՖԱ 4 կատեգորիայի երեք մարզադաշտ։ Դրանցից 2-ը մինչև 10000, իսկ մեկը մինչև 35000 հանդիսականների համար։