29.04.2026 | 13:19
Արման Ծառուկյանը հայտնել է՝ ինչու չի մասնակցելու Սպիտակ տան մրցաշարին
Թրամփի հատուկ բանագնաց Ուիթկոֆը Մոսկվայում է․ ՏԵՍԱՆՅՈՒԹ
Քաղաքականություն
06.08.2025 | 11:02
ԱՄՆ նախագահ Դոնալդ Թրամփի հատուկ բանագնաց Սթիվ Ուիթկոֆը ժամանել է Մոսկվա։ Այս մասին հայտնել է Ինտեֆաքսը՝ հղում անելով տեղեկացված աղբյուրին։ Ըստ աղբյուրի՝ Ուիթկոֆին դիմավորել է Ռուսաստանի ուղղակի ներդրումների հիմնադրամի ղեկավար, արտասահմանյան երկրների հետ տնտեսական համագործակցության հարցերով ՌԴ նախագահի հատուկ ներկայացուցիչ Կիրիլ Դմիտրիևը, գրում է Meduza-ն։
ՏԱՍՍ-ն էլ հայտնում է, որ Ուիթկոֆը և Դմիտրիևն առավոտյան զբոսնել են Մոսկվայի Զարյադյե զբոսայգում։
Սա Ուիթկոֆի հինգերորդ այցն է Ռուսաստան 2025 թվականին։ Վերջին անգամ նա բանակցությունների համար Մոսկվա է այցելել ապրիլի 25-ին, իսկ դրանից առաջ՝ ապրիլի 11-ին, եղել է Սանկտ Պետերբուրգում։ Երկու անգամ էլ Ռուսաստանի նախագահ Վլադիմիր Պուտինը հանդիպումներ են տեղի ունեցել։
ԱՄՆ նախագահ Դոնալդ Թրամփը հուլիսի վերջին Ռուսաստանին տվել էր 10-օրյա ժամկետ, որն ավարտվում է օգոստոսի 8-ին, մինչ այդ, ռուսական բանակը պետք է դադարեցնի ռազմական գործողություններն Ուկրաինայում: Հակառակ դեպքում Թրամփը սպառնացել է պատժամիջոցներ կիրառել Ռուսաստանի դեմ և մաքսատուրքեր սահմանել ռուսական նավթ գնող երկրների նկատմամբ:
Թրամփը հայտարարել է, որ Ռուսաստանի և նրա առևտրային գործընկերների դեմ միջոցների վերաբերյալ որոշում կկայացնի Ուիթկոֆի հետ Մոսկվայում կայացած բանակցություններից հետո։
ՌԴ նախագահ Վլադիմիր Պուտինն ուղիղ չի պատասխանել Թրամփի վերջնագրին։ Օգոստոսի 1-ին նա հայտարարել էր, որ Մոսկվային «անհրաժեշտ է երկարատև և կայուն խաղաղություն՝ լավ, հիմնարար հիմքերի վրա, որը կբավարարի և՛ Ռուսաստանին, և՛ Ուկրաինային»։ Նա ընդգծել էր, որ Ռուսաստանի նպատակները պատերազմում մնացել են նույնը՝ Ուկրաինան պետք է ճանաչի օկուպացված տարածքները որպես ռուսական և հրաժարվի ՆԱՏՕ-ին անդամակցելու ծրագրերից, իսկ Արևմուտքը պետք է վերացնի պատժամիջոցները։
Կրեմլին մոտ կանգնած Reuters-ի աղբյուրները հայտնել են, որ Ռուսաստանը կարող է սկսել խաղաղության բանակցություններ Դոնեցկի, Լուգանսկի, Զապորոժիեի և Խերսոնի մարզերի լիակատար գրավումից հետո: Bloomberg-ի տվյալներով էլ՝ Մոսկվան քննարկում է Թրամփին զիջումներ անելու հնարավորությունը օդում, բայց ո՛չ ցամաքում:
