23.06.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Քրդական SDF-ը հայտնել է Սիրիայի հյուսիսում կառավարական ուժերի հետ բախումների մասին
Քաղաքականություն
04.08.2025 | 18:09
Քրդերի գլխավորած «Սիրիայի դեմոկրատական ուժեր» (SDF) խմբավորումը հայտարարել է, որ իր մարտիկները բախվել են կառավարական ուժերի հետ երկրի հյուսիսում՝ Հալեպ նահանգում, ինչը վերջին միջադեպն է, որը ստվեր է գցում մարտին նրանց կողմից ստորագրված կարևորագույն ինտեգրման համաձայնագրի վրա, գրում է Reuters-ը։
SDF-ը Միացյալ Նահանգների դաշնակից հիմնական մարտական ուժն էր Սիրիայում 2019 թվականին «Իսլամական պետություն» խմբավորմանը պարտության մատնելու մարտերում, այն բանից հետո, երբ ԻՊ-ն խալիֆայություն էր հայտարարել Սիրիայի և Իրաքի տարածքներում։
Մարտին SDF-ը Դամասկոսում իսլամիստների գլխավորած նոր կառավարության հետ համաձայնագիր էր կնքել՝ միանալու Սիրիայի պետական ինստիտուտներին՝ դեկտեմբերին նախկին նախագահ Բաշար ալ-Ասադի տապալումից հետո։
Գործարքի նպատակն էր վերականգնել 14 տարվա պատերազմից մասնատված երկիրը և ճանապարհ հարթել քրդական ուժերի համար, որոնք վերահսկում են Սիրիայի մեկ քառորդը, միավորվելու Դամասկոսի և տարածաշրջանային քրդական իշխանությունների հետ։
SDF-ը հայտարարել է, որ կառավարական ուժերը հարձակվել են Դեյր Հաֆիրում գտնվող իրենց չորս դիրքերի վրա։
«Մենք Դամասկոսի կառավարությանը լիովին պատասխանատու ենք համարում այս վարքագծի համար և վերահաստատում ենք, որ մեր ուժերն այժմ ավելի, քան երբևէ պատրաստ են իրացնել իրենց օրինական իրավունքը՝ արձագանքելու լիարժեք ուժով և վճռականությամբ»,- ասվում է հայտարարության մեջ։
Սիրիայի կառավարությունը և SDF-ը շաբաթավերջին մեղադրանքներ էին փոխանակել մոտակա Մանբիջ քաղաքում տեղի ունեցած հարձակման կապակցությամբ։ Սիրիայի պաշտպանության նախարարությունը մեղադրել էր քրդական ուժերին գյուղական վայրերում գտնվող բանակի հենակետի վրա հրթիռներ արձակելու մեջ։
SDF-ը հայտարարել էր, որ պատասխանում է քաղաքացիական բնակչության վրա չհրահրված հրետանային կրակին։
Թարգմանությունը՝ Էմմա Չոբանյանի
