07.12.2025 | 15:34
Առանձին հատվածներում ձյուն է տեղում․ Թալինի, Աշտարակի և Ապարանի տարածաշրջաններում մառախուղ է
Վոլգոգրադի իշխանությունները հայտնել են ԱԹՍ-ների հարձակման և երկաթուղային կայարանի վնասվելու մասին․ ՏԵՍԱՆՅՈՒԹ
Քաղաքականություն
04.08.2025 | 13:17
Ուկրաինական անօդաչու թռչող սարքերի կողմից Վոլգոգրադի մարզի վրա զանգվածային հարձակման հետևանքով վնասվել է Ֆրոլովո քաղաքի «Արչեդա» երկաթուղային կայարանը։ Այս մասին հայտնել է մարզի նահանգապետ Անդրեյ Բոչարովը, փոխանցում է BBC-ի ռուսական ծառայությունը։
«Ֆրոլովոյում հրշեջները մարում են «Արչեդա» կայարանի տեխնիկական շենքում բռնկված հրդեհը, կոտրվել են երկու հարակից բնակելի շենքերի պատուհանները, երկաթուղային կայարանի ուղևորատար ենթակառուցվածքը չի վնասվել: Երկաթուղային գծերի վրա գտնվող չպայթած անօդաչու թռչող սարքը վերացնելու համար Ֆրոլովսկի շրջանի «Արչեդա» կայարանի տարածքում գնացքների երթևեկությունը ժամանակավորապես սահմանափակվել է, աշխատում են սակրավորները: Ռելսերի վնաս չի նկատվել»,- նշել է նա։
Պրիվոլժսկայա երկաթուղին հաղորդում է, որ անօդաչու թռչող սարքի անկման պատճառով ուշացել են չորս ուղևորատար գնացքներ (ներառյալ՝ Մոսկվա-Վոլգոգրադ գնացքը)։
Նահանգապետն ավելի վաղ հայտնել էր նաև, որ մարզի Իլովլինսկի շրջանում անօդաչու թռչող սարքի բեկորների ընկնելու հետևանքով կտրվել է բարձրավոլտ լարը, էներգետիկներն աշխատում են էլեկտրամատակարարումը վերականգնելու ուղղությամբ։
Իշխանությունների տվյալներով՝ տուժածներ չկան։
ՌԴ ՊՆ-ն էլ հայտնել է, որ օգոստոսի լույս 4-ի գիշերը խոցվել է 61 անօդաչու թռչող սարք․ 18-ը՝ Սև ծովի, 12-ը՝ Վորոնեժի մարզի, 11-ը՝ բռնակցված Ղրիմի, 8-ը՝ Բելգորոդի, 6-ը՝ Վոլգոգրադի, 2-ը՝ Բրյանսկի և Ռոստովի մարզերի, մեկական՝ Մոսկվայի և Ռյազանի մարզերի վրա։
Թարգմանությունը՝ Էմմա Չոբանյանի
