17.02.2026 | 14:45
ՀՁՖ նախագահը մեդալների ակնկալիք ունի երևանյան ԵԱ-ում
ԵԱՀԿ-ն ձախողվեց Լեռնային Ղարաբաղում․ Սերգեյ Լավրով
Քաղաքականություն
01.08.2025 | 15:29
ՌԴ արտաքին գործերի նախարար Սերգեյ Լավրովը կոչ է անում մտածել ԵԱՀԿ-ի շարունակական գոյության անհրաժեշտության մասին՝ հաշվի առնելով կառույցում կուտակված խնդիրների ծավալը։ «Российская газета»-ում հրապարակված «Հելսինկյան ակտի կես դարը. սպասումներ, իրականություն, հեռանկարներ» վերնագրով հոդվածում նա նշել է, թե Ռուսաստանը Եվրասիայում հավասար և անբաժանելի անվտանգության կայուն և ճկուն ճարտարապետության ձևավորումը համարում է ռազմավարական չափանիշ։
«ԵԱՀԿ-ի կուտակված խնդիրների ծավալը մեծ է։ Նրանց բեռի տակ այն մղվել է միջազգային գործընթացների երկրորդ պլան։ Վիեննայի հարթակում տեղ չկա ո՛չ համագործակցության, ո՛չ էլ անվտանգության համար։ Հելսինկյան եզրափակիչ ակտը մշակողներն այսպես չէին պատկերացնում համաեվրոպական գործընթացի ապագան։ Ժամանակն է մտածել այն մասին՝ արդյո՞ք իմաստ ունի նման կազմակերպության շարունակական գոյությունը»,- գրել է ռուսաստանցի պաշտոնյան։
Լավրովն անդրադարձել է նաև Լեռնային Ղարաբաղի համակարտության կարգավորման գործում ԵԱՀԿ Մինսկի դերակատարմանը՝ այն ձախողված համարելով։
«ԵԱՀԿ-ն ձախողվեց նաև Լեռնային Ղարաբաղում: Մինսկի խումբն այդպես էլ չկարողացավ պայմաններ ստեղծել հակամարտող կողմերի միջև երկխոսության համար, իսկև այն բանից հետո, երբ դրա արևմտյան մասնակիցները հրաժարվեցին Ռուսաստանի հետ փոխգործակցությունից, այն ամբողջությամբ կորցրեց իր իմաստը»,- ընդգծել է Սերգեյ Լավրովը։
Հավելենք, որ ԵԱՀԿ Մինսկի խումբը լուծարելու պահանջով հանդես է գալիս Ադրբեջանի նախագահ Իլհամ Ալիևը՝ դա որպես Հայաստանի և Ադրբեջանի միջև խաղաղության համաձայնագրի ստորագրման նախապայման առաջադրելով։
