Լոնդոնը հայտարարել է, որ կճանաչի Պաղեստին պետությունը, եթե Իսրայելը չկատարի մի շարք պայմաններ

Մեծ Բրիտանիան մտադիր է սեպտեմբերին ՄԱԿ-ի Գլխավոր վեհաժողովում ճանաչել Պաղեստին պետությունը, եթե «Իսրայելի կառավարությունը նշանակալի քայլեր չձեռնարկի Գազայում սարսափելի իրավիճակին վերջ դնելու համար»։ Այս մասին հայտարարել է երկրի վարչապետ Քիր Սթարմերը, գրում է BBC-ի ռուսական ծառայությունը:

Սթարմերը նշել է, որ Իսրայելը պետք է համաձայնի հրադադարի և պարտավորվի աշխատել կայուն խաղաղության գործընթացի ուղղությամբ՝ վերակենդանացնելով «երկու պետություն՝ երկու ժողովուրդների համար» հեռանկարը։ Բացի այդ, Իսրայելը պետք է թույլ տա ՄԱԿ-ին մարդասիրական օգնություն տրամադրել պաղեստինցիներին և դադարեցնել Արևմտյան ափի տարածքների բռնակցումը։ Եթե Իսրայելը չկատարի այս պայմանները, Մեծ Բրիտանիան կճանաչի Պաղեստինի պետությունը։

Բրիտանացի պաշտոնյան նաև ասել է, որ  ՀԱՄԱՍ-ը պետք է ազատ արձակի մնացած պատանդներին, համաձայնի հրադադարի, վայր դնի զենքերը և ընդունի, որ խումբը որևէ դեր չի ունենա Գազայի հատվածի կառավարման գործում։

Սթարմերը Մեծ Բրիտանիայի՝ Պաղեստին պետությունը ճանաչելու մտադրության մասին հայտարարել է լրագրողների և մարդու իրավունքների պաշտպանների բազմաթիվ հաղորդագրությունների ֆոնին, որ Գազայի բնակիչները զանգվածային սովի վտանգի տակ են։ Գազայի և մարդասիրական օգնության մատակարարումների խնդիրը Սթարմերի և ԱՄՆ նախագահ Դոնալդ Թրամփի՝ հուլիսի 28-ի հանդիպումից հետո կայացած մամուլի ասուլիսի հիմնական թեմաներից էր։

Սթարմերը բացատրել է, որ ճանաչման հայտարարությունն անելուն իրեն դրդել է երկու հանգամանք՝ Գազայի հատվածում տիրող «անտանելի իրավիճակը» և մտավախությունը, որ «երկու պետություն՝ երկու ժողովուրդների համար» գաղափարն օրեցօր ավելի ու ավելի քիչ իրատեսական է դառնում։

Հարցին՝ ինչո՞ւ է Մեծ Բրիտանիան պայմաններ դնում Պաղեստինի պետությունը ճանաչելու համար, վարչապետը պատասխանել է, որ հիմնական նպատակն է փոխել տեղում ստեղծված իրավիճակը՝ թե՛ պատանդների ազատ արձակման, թե՛ մարդասիրական օգնության մատակարարման միջոցով: Նրա հայտարարությունը պետք է նպաստի դրան հասնելուն:

Պաղեստինյան պետությունը պաշտոնապես ճանաչվել է ՄԱԿ-ի 193 անդամ պետություններից 147-ի կողմից, այդ թվում՝ Ռուսաստանի, Չինաստանի և Լատինական Ամերիկայի ու Աֆրիկայի երկրների մեծամասնության կողմից։ Սակայն Եվրոպայի մեծ մասը մինչև վերջերս չէր ճանաչում Պաղեստինի ինքնիշխանությունը։

2024 թվականի մայիսին Պաղեստին պետությունը ճանաչեցին միանգամից երեք երկիր՝ ԵՄ անդամներ Իռլանդիան և Իսպանիան, ինչպես նաև Նորվեգիան։ Հունիսին նրանց հետևեց նաև Սլովենիան։

Սթարմերի հայտարարությունից մի քանի օր առաջ էլ Ֆրանսիայի նախագահ Էմանուել Մակրոնն էր հայտարարել էր Պաղեստին պետությունը սեպտեմբերին ՄԱԿ-ի Գլխավոր վեհաժողովում ճանաչելու ծրագրերի մասին։

Իսրայելը կոշտ է արձագանքել Մեծ Բրիտանիայի վարչապետի հայտարարությանը։ Իսրայելի վարչապետ  Բենիամին Նեթանյահուն քննադատել է այն՝ նշելով, որ դա «պարգևատրում է ՀԱՄԱՍ-ի հրեշավոր ահաբեկչությունը և պատիժ դրա զոհերին»։

«Իսրայելի սահմանին այսօր ջիհադիստական պետությունը վաղը կսպառնա Մեծ Բրիտանիային։ Ջիհադիստ ահաբեկիչների նկատմամբ հանդուրժողականությունը միշտ դատապարտված է ձախողման: Այն ձեզ էլ կձախողի»,- նշել է Նեթանյահուն X-ում գրառմամբ։

Թարգմանությունը՝ Էմմա Չոբանյանի