«Թուրքիան եվրոպական միջոցներն օգտագործում է լրտեսության համար»․ ԵԽ պատգամավորները հետաքննություն են պահանջում

Եվրախորհրդարանի պատգամավորները բողոք են ներկայացրել Եվրոպական հանձնաժողովին, որով պահանջում են հետաքննել Nordic Monitor-ի այն եզրակացությունները, որ Թուրքիայի նախագահ Ռեջեփ Թայիփ Էրդողանի կառավարությունը եվրոպական միջոցներով Եվրոպայում լրտեսական գործողություններ է ֆինանսավորում, գրում է Euronews-ը։

ԵՄ-ում լրտեսական ցանցերի/գործողությունների ֆինանսավորման համար Թուրքիայի կողմից ԵՄ անդամակցության միջոցների չարաշահումը դատապարտվել է Եվրախորհրդարանի պատգամավոր Կոստաս Մավրիդիսի (DIKO – S&D) կողմից Եվրոպական հանձնաժողովին ուղղված գրավոր նամակում։ Բողոքը ստորագրել են տարբեր քաղաքական խմբեր և ազգություններ ներկայացնող Եվրախորհրդարանի այլ  պատգամավորներ։

Դիմումում մեջբերվում են շվեդական հեղինակավոր Nordic Monitor լրատվականի տվյալները, որոնց համաձայն՝ ԵՄ-ին Թուրքիայի անդամակցությանն աջակցելու համար Եվրամիության կողմից հատկացված 10 միլիարդ եվրոյից հարյուր միլիոնավոր եվրոներ Էրդողանի կառավարությունն օգտագործել է Եվրոպայում լրտեսական գործողություններ ֆինանսավորելու համար։

Հաղորդվում է, որ Թուրքիայի արտաքին և ներքին գործերի նախարարությունները միլիոնավոր եվրոներ են օգտագործել եվրոպական միջոցներից՝ ԵՄ անդամակցության օժանդակության գործիքից, ԵՄ պետությունների վերաբերյալ հետախուզական տվյալներ հավաքելու համար։

Մասնավորապես, Nordic Monitor-ի հրապարակած նամակի համաձայն՝ Թուրքիայի արտաքին գործերի նախարարությունը 2014-2024 թվականներին ԵՄ միջոցներից ծախսել է 339,9 միլիոն եվրո, ներքին գործերի նախարարությունը նույն ժամանակահատվածում օգտագործել է 327.9 միլիոն եվրո։ Փաստաթղթում նաև նկարագրվում է օգտագործված մեխանիզմը (կեղծ ընկերություններ և հաշիվ-ապրանքագրեր, կեղծված հաշվապահական փաստաթղթեր և այլն)՝ միջոցների տեղաշարժը թաքցնելու համար այնպես, որ այն ներկայացվի օրինական։

Եվրախորհրդարանի պատգամավորները կոչ են անում Հանձնաժողովին հետաքննել այս սկանդալային բացահայտումները և տեղեկացնել՝ արդյո՞ք ԵՄ այլ համապատասխան մարմիններ/գործակալություններ (օրինակ՝ Եվրոպական խարդախության դեմ պայքարի գրասենյակը (OLAF)) ներգրավված են հետաքննությանը և ինչ գործողություններ կձեռնարկվեն, եթե որևէ խախտում հաստատվի։

Բացի այդ, պատգամավորները նաև խնդրում են Եվրահանձնաժողովին ապահովել, որ եվրոպացի հարկատուների գումարները չօգտագործվեն այնպիսի  միջոցներով, որոնք հակասում են ԵՄ շահերին և արժեքներին։