Բրիտանիան և Գերմանիան հարձակման դեպքում փոխադարձ պաշտպանության պայմանագիր կստորագրեն

Մեծ Բրիտանիայի վարչապետ Քիր Սթարմերը և Գերմանիայի կանցլեր Ֆրիդրիխ Մերցը հուլիսի 17-ին Լոնդոնում պայմանագիր կստորագրեն, որը ներառում է փոխադարձ պաշտպանության պարտավորություն՝ զինված հարձակման դեպքում: Politico-ն փաստաթուղթն անվանում է 1945 թվականից ի վեր ամենամեծ համաձայնագիրը երկու երկրների միջև, փոխանցում է Current time-ը։

Bloomberg-ը, հղում անելով գերմանացի բարձրաստիճան պաշտոնյայի, գրում է, որ համատեղ պաշտպանության կետն արձագանքն է ավելի ու ավելի ագրեսիվ Ռուսաստանին ու եվրոպացի դաշնակիցների շրջանում աճող մտահոգություններին՝ ԱՄՆ-ի նախագահ Դոնալդ Թրամփի օրոք ՆԱՏՕ-ի նկատմամբ «հանձնառության» վերաբերյալ։

Նշվում է, որ պաշտպանական տարրը հատկապես կարևոր է Գերմանիայի համար, քանի որ Մեծ Բրիտանիան, Ֆրանսիայի հետ միասին, Եվրոպայի երկու միջուկային տերություններից է։ Գերմանիան չունի սեփական միջուկային մարտագլխիկներ, բայց օգտագործում է պաշտպանիչ «հովանոցը», որը Միացյալ Նահանգները տարածել է մայրցամաքի վրա։ Միևնույն ժամանակ, աղբյուրի փոխանցմամբ, պայմանագրում միջուկային զենքի մասին ուղղակիորեն չի նշվում։

Սթարմերն ու Մերցը նաև պարտավորություն են ստանձնելու հաջորդ տասնամյակի ընթացքում մշակել նոր հեռահար հրթիռային համակարգ, որը, ըստ որոշ տեղեկությունների, կունենա ավելի քան 2000 կիլոմետր հեռահարություն և կնպաստի Մեծ Բրիտանիայի ու Եվրոպայի պաշտպանության ոլորտում ներդրումների ավելացմանը։

Բացի այդ, հանդիպման ընթացքում, ըստ Politico-ի, Լոնդոնը և Բեռլինը կքննարկեն քվանտային տեխնոլոգիաների, արհեստական բանականության և այլ երկարաժամկետ նախագծերի ոլորտում համագործակցությունը, այդ թվում՝ Հյուսիսային ծովում ծովային էներգետիկ հաղորդակցությունները և երկրների միջև երկաթուղային  հաղորդակցությունը։

Թարգմանությունը՝ Էմմա Չոբանյանի