Ֆրանսիան, Իտալիան և Չեխիան հրաժարվել են մասնակցել Ուկրաինայի համար ամերիկյան զենքի գնման նախաձեռնությանը

ՆԱՏՕ-ի անդամ եվրոպական երեք երկիր՝ Ֆրանսիան, Իտալիան ու Չեխիան, հրաժարվել են մասնակցել Ուկրաինայի համար ամերիկյան զենքի գնման նախաձեռնությանը։ Այս մասին հայտնել են արևմտյան մի շարք լրատվամիջոցներ՝ հղում անելով աղբյուրներին, գրում է DW-ի ռուսական ծառայությունը։

Ըստ Politico-ի՝ Ֆրանսիայի բացասական դիրքորոշումը բացատրվում է նրանով, որ երկրի նախագահ Էմանուել Մակրոնը վաղուց պնդում է, որ եվրոպացիները զարգացնեն իրենց սեփական պաշտպանական արդյունաբերությունը ներքին գնումների միջոցով: Միևնույն ժամանակ, Ֆրանսիայի կառավարությունը, փորձելով հաղթահարել բյուջեի դեֆիցիտը, դժվարանում է խթանել սեփական պաշտպանական ծախսերը:

Նույն՝ բյուջետային պատճառներով Իտալիան նույնպես չի ցանկանում միանալ գնումների համար վճարելու նախաձեռնությանը։

«Իտալիան գործնականում բյուջետային հնարավորություններ չունի։ Այստեղ երբեք խոսք չի եղել ամերիկյան զենք գնելու մասին»,- La Stampa-ին հայտնել են Իտալիայի պաշտպանության նախարարության աղբյուրները։

Չեխիայի վարչապետ Պետր Ֆիալան ևս հայտարարել է, որ իր երկիրը մտադիր չէ մասնակցել Ուկրաինայի համար ամերիկյան զենքի գնմանը։

«Չեխիան կենտրոնացած է Ուկրաինային աջակցելու այլ նախագծերի և եղանակների վրա, ինչպիսին է չեխական զինամթերքի նախաձեռնությունը։ Հետևաբար, այս փուլում մենք չենք քննարկում այս ծրագրին մասնակցությունը»,- ասել է նա Publico-ին տված մեկնաբանության մեջ։

Politico-ն Գերմանիան անվանում է Ուկրաինային ամերիկյան զենքի մատակարարման համար վճարելու գաղափարի հիմնական նախաձեռնողներից մեկը։ Երկրի կանցլեր Ֆրիդրիխ Մերցի խոսքով՝ վերջին օրերին ինքը մի քանի անգամ խոսել է ԱՄՆ նախագահ Դոնալդ Թրամփի հետ և վստահեցրել, որ Գերմանիան «որոշիչ դեր կխաղա» մատակարարումների հարցում։

Մերցի կառավարությունը գտնում է, որ ամերիկյան զենքի գնումը Ուկրաինային անհրաժեշտ միջոցներով արագ ապահովելու քիչ տարբերակներից մեկն է՝ հաշվի առնելով Եվրոպայի սահմանափակ արտադրական հզորությունները։

ՆԱՏՕ-ի գլխավոր քարտուղար Մարկ Ռյուտեն էլ Մեծ Բրիտանիային, Նիդերլանդներին, Դանիային, Շվեդիային, Նորվեգիային և Կանադային է անվանել ամերիկյան մատակարարումների համար վճարելու նախաձեռնության կողմնակիցներ։

Հուլիսի 14-ին Թրամփը հայտարարել էր, որ Միացյալ Նահանգներն ու նրա դաշնակիցները կնքել են Ուկրաինային զենք մատակարարելու մասին համաձայնագիր, որի համաձայն՝ Կիևին կմատակարարվի ամերիկյան զենք, իսկ դրա համար կվճարեն Հյուսիսատլանտյան դաշինքի երկրները։ Հաջորդ օրը Թրամփը նշել էր,  որ Patriot համակարգերի համար Ուկրաինային հրթիռների մատակարարումն արդեն իսկ իրականացվում է Գերմանիայից, «և հետո  Գերմանիան կփոխարինի դրանք»։

Թարգմանությունը՝ Էմմա Չոբանյանի