05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
Իրանի խորհրդարանը բացառում է ԱՄՆ-ի հետ բանակցությունների վերսկսումը՝ մինչև Թեհրանի նախապայմանների կատարումը
Քաղաքականություն
16.07.2025 | 16:23
Իրանի խորհրդարանը հայտարարել է, որ երկիրը չպետք է վերսկսի միջուկային բանակցությունները Միացյալ Նահանգների հետ՝ մինչև Թեհրանի նախապայմանների կատարումը։ Այս մասին ասվում է Իրանի պետական լրատվամիջոցների կողմից տարածված հայտարարության մեջ, գրում է Reuters-ը։
«Երբ ԱՄՆ-ը բանակցություններն օգտագործում է որպես գործիք՝ Իրանին խաբելու և սիոնիստական ռեժիմի կողմից հանկարծակի ռազմական հարձակումը թաքցնելու համար, բանակցությունները չեն կարող վարվել նախկինի պես։ Պետք է նախապայմաններ սահմանվեն, նոր բանակցություններ չեն կարող տեղի ունենալ, քանի դեռ դրանք լիովին չեն կատարվել»,- ասվում է հայտարարության մեջ։
Դրանում նախապայմանները սահմանված չեն, սակայն Իրանի արտաքին գործերի նախարար Աբբաս Արաքչին ավելի վաղ հայտարարել էր՝ պետք է երաշխիքներ լինեն, որ Թեհրանի դեմ հետագա հարձակումներ չեն լինի։
Իսրայելը և ԱՄՆ-ն անցյալ ամիս հարվածներ էի հասցրել Իրանի միջուկային օբյեկտներին՝ պնդելով, որ դրանք միջուկային զենքի մշակմանն ուղղված ծրագրի մաս են կազմում։ Թեհրանը պնդում է, որ իր միջուկային ծրագիրը բացառապես քաղաքացիական նպատակներ ունի։
12-օրյա պատերազմից առաջ Թեհրանը և Վաշինգտոնը Օմանի միջնորդությամբ անցկացրել էին անուղղակի բանակցությունների հինգ փուլ, որոնց ընթացքում ԱՄՆ-ի պահանջները Թեհրանից՝ դադարեցնել ուրանի հարստացման ծրագիրը, փակուղի էին մտել։
Անցյալ շաբաթ Արաղչին վերահաստատել էր Թեհրանի դիրքորոշումը՝ երկիրը չի համաձայնվի միջուկային համաձայնագրի, որը կկանխի նրա ուրանի հարստացումը, և կհրաժարվի քննարկել միջուկայինից դուրս թեմաներ, ինչպիսիք են բալիստիկ հրթիռների ծրագիրը։
ԱՄՆ նախագահ Դոնալդ Թրամփը երեքշաբթի հայտարարել է, որ չի շտապում Իրանի հետ բանակցություններ վարել, քանի որ նրա միջուկային օբյեկտներն այժմ «ոչնչացված են», սակայն ԱՄՆ-ը, երեք եվրոպական երկրների հետ համակարգված համագործակցությամբ, համաձայնել է օգոստոսի վերջը սահմանել որպես համաձայնագրի կնքման վերջնաժամկետ։
Ֆրանսիայի արտաքին գործերի նախարար Ժան-Նոել Բարոն էլ հայտարարել է, որ Փարիզը, Լոնդոնը և Բեռլինը կգործարկեն ՄԱԿ-ի պատժամիջոցների չեղարկման մեխանիզմը, որը թույլ կտա միջազգային պատժամիջոցները վերականգնել Իրանի նկատմամբ մինչև օգոստոսի վերջ, եթե համաձայնագրի հարցում կոնկրետ առաջընթաց չգրանցվի։
Թարգմանությունը՝ Էմմա Չոբանյանի
