02.05.2024 | 21:47
Ընդունելության միասնական քննությունների 2-րդ փուլին հայտագրվելը պարտադիր է. վերջնաժամկետը մայիսի 10-ն է
«Նույն ձևով կարելի էր Վլադիմիր Գասպարյանին և Սերժ Սարգսյանին նշանակել»․ իրավապաշտպանները՝ Հունան Պողոսյանի նշանակման մասին
Քաղաքականություն
16.10.2018 | 20:40
Նախկին փոխոստիկանապետ Հունան Պողոսյանի նշանակումը Սյունիքի մարզպետի պաշտոնում հակասական մեկնաբանություններ առաջացրեց:
«ՀՀ-ում չպետք է թույլ տանք, որ զարգանա մի այնպիսի երևույթ, որը կարելի է կոչել քաղաքական ռասիզմ, երբ մարդիկ հետապնդվում են այն պատճառով, որ նրանք գործունեություն են ծավալել նախկին իշխանությունների հետ»,- հայտարարեց Նիկոլ Փաշինյանը:
Factor.am-ի հետ զրույցում Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը նշեց. «Պետք է ենթադրեմ, որ վարչապետը նկատի ուներ տարբեր քաղաքական հայացքներ ունեցող մարդկանց: Բայց Հունան Պողոսյանը քաղաքական գործիչ չէ: Այստեղ քաղաքական խտրականության մասին խոսք չի կարող լինել: Ես կհասկանայի, եթե խոսքը վերաբերեր Շարմազանովին, Աշոտյանին կամ Սերժ Սարգսյանին: Այստեղ ուրիշ հարց պետք է դիտարկել`որքանո՞ վ է Հունան Պողոսյանը պատասխանատու իր պաշտոնավարման շրջանում մարդու իրավունքների խախտումների համար:
Չմոռանանք, որ մեր և այլ կառույցների բազմաթիվ զեկույցներում կան բազմաթիվ տվյալներ ՀՀ ոստիկանության կողմից մարդու իրավունքների խախտումների մասին: Այդ կառույցի միջոցով ճնշվել և հետապնդվել են ընդդիմադիր քաղաքական գործիչներ, ակտիվիստներ:
Իհարկե, մեր տրամադրության տակ չկա որևէ իրավական ակտ, բայց զարմանալի կլինի, եթե ոստիկանության ղեկավարներից մեկը կապ չունենա թվարկածս երևույթների հետ:
Քանի դեռ չի իրականացվում անցումային արդարադատություն, նոր Հայաստանում կարող ենք ունենալ այդպիսի նշանակումներ: Այս նշանակումը չեմ համարում առանձին արտառոց երևույթ: Պետք է ամբողջական գնահատական տրվի նախկին ավտորիտար ռեժիմին: Դա անպատժելի մարդկանց պատժելի դարձնելու ճանապարհն է, որ հետագայում Աղվան Հովսեփյանը, Հայկ Հարությունյանը կամ այլ մեկը չհավակնի այդպիսի պաշտոնի»:
Իրավապաշտպան Ժաննա Ալեքսանյանի համար Պողոսյանի նշանակումն անընդունելի է:
Տիկին Ալեքսանյանը հիշատակեց «Էլեկտրիկ Երևանի» բռնությունները, որոնցում, ըստ նրա, մեծ էր Հունան Պողոսյանի դերը:
Մեր զրուցակցի խոսքով`Հունան Պողոսյանը միշտ ծառայել է նախկին ռեժիմին և եղել է օրենքից դուրս: «Ինձ համար հասկանալի չէ Փաշինյանի`ռասիզմի մասին հայտարարությունը: Նույն ձևով կարելի էր Վովա Գասպարյանին և Սերժ Սարգսյանին նշանակել: Եթե Օսիպյանի նշանակումը բացատրվում էր կոռումպացված չլինելով, ապա Պողոսյանը ոստիկանության ամենահարուստ պաշտոնյաներից է: Չկա մի պատճառ, որ հասկանամ այս նշանակման տրամաբանությունը»,-ասաց Ալեքսանյանը:
Լևոն Փանոսյան
