Գրիգորի Մելքոնյանցի ազատազրկումից հետո ընտրողների իրավունքների պաշտպանության համառուսաստանյան «Գոլոս» շարժումը հայտարարել է գործունեությունը դադարեցնելու մասին

Ընտրողների իրավունքների պաշտպանության համառուսաստանյան հասարակական «Գոլոս» շարժումը հայտարարել է գործունեությունը դադարեցնելու մասին: Որոշումը կապված է շարժման համանախագահ Գրիգորի Մելքոնյանցի դատավճռի հետ, որը դատապարտվել էր 5 տարվա ազատազրկման՝ «անցանկալի» կազմակերպության գործունեությունը կազմակերպելու համար, գրում է Current Time-ը:

Նրա պաշտպանությունը ստացել է դատավճռի տեքստը, որում դատարանը «գործնականում հավասարություն է դնում «Գոլոս»-ի և անցանկալի ճանաչված ENEMO կազմակերպության միջև»։

«Դատարանի այս որոշումը ընտրության հնարավորություն չի թողնում, քանի որ այն քրեական հետապնդման վտանգի տակ է դնում ոչ միայն «Գոլոս»-ի բոլոր մասնակիցներին, այլև նույնիսկ այն մարդկանց, ովքեր պարզապես դիմել են խորհրդատվության և իրավաբանական օգնության համար»,- ասվում է տարածված հայտարարության մեջ։

Շարժումը նշել է, որ «Գոլոսի»-ի բոլոր տարածաշրջանային մասնաճյուղերը լուծարվել են, վաղաժամկետ դադարեցվել են տարածաշրջանային մասնաճյուղերի նախագահների, տարածաշրջանային մասնաճյուղերի խորհուրդների անդամների և աուդիտի հանձնաժողովի անդամների լիազորությունները, դադարեցվել են բոլոր նախագծերը, տեղեկատվական ռեսուրսների աշխատանքը։

Շարժումը խորհուրդ է տալիս Ռուսաստանում գտնվողներին կամ այնտեղ այցելել ցանկացողներին չվերահրապարակել շարժման կայքերից կամ սոցիալական ցանցերից գրառումներ։ Եթե նման հղումներ արվել են, դրանք պետք է ջնջվեն, որպեսզի Ռուսաստանի իրավապահ մարմինները չկարողանան պատասխանատվության ենթարկել նրանց։

Մելքոնյանցի գործի հետաքննության համաձայն՝ «Գոլոսը» մտնում էր Ընտրությունների մոնիտորինգի եվրոպական կազմակերպությունների ցանցի մեջ (ENEMO), որը Ռուսաստանում համարվել է «անցանկալի»։

Շարժումը բացատրել էր, որ ENEMO-ի հիմնադիրը «Գոլոս» միավորումն է, որն «օտարերկրյա գործակալի» կարգավիճակ ստանալուց հետո փաստացի դադարեցրել է գործունեությունը և 2016 թվականին դատարանի որոշմամբ լուծարվել, իսկ 2020 թվականին պաշտոնապես հանվել է իրավաբանական անձանց գրանցամատյանից։

«Գոլոս»-ը ENEMO-ի անդամ չի եղել։

Թարգմանությունը՝ Էմմա Չոբանյանի