29.04.2026 | 14:27
Ձերբակալություններ՝ ընտրակաշառք ստանալու և բարեգործության արգելքը խախտելու դեպքով
Ռուբեն Վարդանյանը դիմել է Բաքվի դատարանին՝ մի շարք փաստաթղթեր տրամադրման խնդրանքով
Քաղաքականություն
08.07.2025 | 21:23
Բաքվի զինվորական դատարանում այսօր տեղի է ունեցել Արցախի նախկին պետնախարար Ռուբեն Վարդանյանի նկատմամբ հարուցված շինծու գործերով դատական նիստը։ Ադրբեջանական լրատվամիջոցների հաղորդմամբ՝ նիստը նախագահող դատավոր Զեյնալ Աղաևը հայտնել է, որ դիտարկվել են Ռուբեն Վարդանյանի կողմից նախորդ դատական նիստում ներկայացված միջնորդության վերաբերյալ քրեական գործի նյութերը։ Նա նշել է, որ դատարանը գնահատել է նրա և պաշտպանի կողմից ներկայացված բոլոր միջնորդությունները։
Նիստի ընթացքում Ռուբեն Վարդանյանը դիմել է դատարանին։ Նա նշել է, որ դատավորների կազմը նախկինում պայմաններ է ստեղծել իր և իր պաշտպանի համար՝ նիստի արձանագրություններին ծանոթանալու համար։ Այժմ նրանք ցանկանում են ծանոթանալ նախապատրաստական նիստում կայացված և արձանագրություններում արտացոլված որոշումներին։
Բացի այդ, պաշտպանությունը խնդրել է իրենց տրամադրել որոշումներից քաղվածքներ՝ տարբեր ամսաթվերին կայացած նիստերում իրենց ներկայացրած միջնորդությունների բավարարման։ Փաստաբան Աբրահամ Բերմանը պաշտպանել է Վարդանյանի դիմումը։
Զեյնալ Աղաևը նշել է, որ մինչ այժմ դատարանը պայմաններ է ստեղծել «մեղադրյալի և նրա պաշտպանի համար՝ ծանոթանալու իրենց հետաքրքրող փաստաթղթերին, և ինչպես նախկինում, կրկին պայմաններ կստեղծվեն» ։
Այնուհետև դատավարության ժամանակ ցուցմունք են տվել, իբր, ««տուժողներ, ինչպես նաև Հայաստանի ագրեսիվ պատերազմի և օկուպացիոն քաղաքականության ընթացքում կատարված հանցագործությունների հետևանքով զոհվածների իրավահաջորդները»։
Հաջորդ դատական նիստը նշանակվել է հուլիսի 15-ին։
Թարգմանությունը՝ Էմմա Չոբանյանի
