16.07.2026 | 21:58
ԿԼ. «Ալաշկերտը» վերջին վայրկյաններին փրկվեց պարտությունից ու հաղթեց հետխաղային 11-մետրանոցներով․ ՏԵՍԱՆՅՈՒԹ
Թրամփը լրացուցիչ 10% մաքսատուրքով է սպառնում «ԲՐԻԿՍ-ի հակաամերիկյան քաղաքականությանը միացող ցանկացած երկրի»
Քաղաքականություն
07.07.2025 | 13:25
ԱՄՆ նախագահ Դոնալդ Թրամփը սպառնում է մաքսատուրքեր սահմանել ԲՐԻԿՍ-ին աջակցող երկրների նկատմամբ։
«ԲՐԻԿՍ-ի հակաամերիկյան քաղաքականությանը միացող ցանկացած երկրից կգանձվի ԼՐԱՑՈՒՑԻՉ 10% մաքսատուրք։ Այս քաղաքականության համար բացառություններ չեն լինի»,- գրել է Թրամփը Truth Social սոցցանցում։
Հավելենք, որ ԲՐԻԿՍ-ի երկրների՝ Ռիոյում կայացած գագաթնաժողովի հռչակագրում «լուրջ մտահոգություն» է արտրահայտվել միակողմանի մաքստուրքերի և ոչ մաքսատուրքային միջոցառումների աճող թվի վերաբերյալ, որոնք «խաթարում են առևտուրը և չեն համապատասխանում ԱՀԿ կանոններին»։ Նշվում է, որ նման միջոցառումները «սպառնում են ավելի կրճատել համաշխարհային առևտուրը և խաթարել համաշխարհային մատակարարման շղթաները», ինչը «կարող է սրել առկա տնտեսական անհավասարակշռությունները և ազդել համաշխարհային տնտեսական հեռանկարների վրա»։
Փաստաթղթում ուղղակիորեն չի հիշատակվում ԱՄՆ-ը կամ նրա նախագահ Դոնալդ Թրամփը։
Ռիոյի գագաթնաժողովի հռչակագիրը դատապարտում է Իրանի «քաղաքացիական ենթակառուցվածքների և խաղաղ միջուկային օբյեկտների» վրա հարձակումները, որոնք գործել են «Ատոմային միջազգային էներգիայի գործակալության լիակատար պաշտպանության ներքո»։ Բացի այդ, փաստաթղթի համաձայն՝ ԲՐԻԿՍ-ի երկրները «խորապես մտահոգված են Պաղեստինի օկուպացված տարածքում ստեղծված իրավիճակով՝ կապված Գազայի հատվածի վրա Իսրայելի շարունակական հարձակումների վերսկսման և դրա տարածք մարդասիրական օգնության մատակարարման խոչընդոտման հետ»։
Գագաթնաժողովի մասնակից երկրները նաև դատապարտել են ուկրաինական զինվորականների կողմից մայիս և հունիս ամիսներին ՌԴ երկաթուղային ենթակառուցվածքների վրա հարձակումները:
«Մենք ամենախիստ կերպով դատապարտում ենք 2025 թվականի մայիսի 31-ին, հունիսի 1-ին և 5-ին ՌԴ Բրյանսկի, Կուրսկի և Վորոնեժի մարզերի քաղաքացիական բնակչությանը դիտավորյալ թիրախավորող կամուրջների և երկաթուղային ենթակառուցվածքների վրա հարձակումները, որոնց հետևանքով զոհվել են մի քանի քաղաքացիական անձինք, այդ թվում՝ երեխաներ»,- ասվում է փաստաթղթում։
Գագաթնաժողովի մասնակիցները նաև հույս են հայտնել, որ Ռուսաստանը և Ուկրաինան կհասնեն «կայուն խաղաղ կարգավորման»։
Կազմակերպության անդամ երկրները «խստորեն դատապարտել» են նաև ապրիլի 22-ին Քաշմիրի Հնդկաստանի վերահսկողության տակ գտնվող հատվածում տեղի ունեցած ահաբեկչական հարձակումը։
ԲՐԻԿՍ-ը սկզբնապես չորս երկրի՝ Բրազիլիայի, Ռուսաստանի, Հնդկաստանի և Չինաստանի միավորում էր։ 2010 թվականին դրան միացել է Հարավաֆրիկյան Հանրապետությունը, իսկ 2024 թվականի սկզբին՝ Իրանը, Եգիպտոսը, Եթովպիան և Արաբական Միացյալ Էմիրությունները, ավելի ուշ՝ Ինդոնեզիան։
Թարգմանությունը՝ Էմմա Չոբանյանի
