Վլադիմիր Զելենսկին հատուկ պատժամիջոցներ է սահմանել Ռուսաստանի նկատմամբ

Ուկրաինայի նախագահ Վլադիմիր Զելենսկին կիրակի՝ հուլիսի 6-ին, հայտարարել է, որ Ռուսաստանի դեմ կիրառել է հատուկ պատժամիջոցներ։ Այդ մասին նշվում է նախագահական գրասենյակի կայքում հրապարակված հրամանագրում։ Telegram-ի իր ալիքում Զելենսկին գրել է, որ պատժամիջոցները վերաբերել են ֆինանսական և կրիպտոարժույթային սխեմաներին։ Սահմանափակումների տակ հայտնվել են հատկապես մայնինգի և ներդրումների ոլորտում գործող ընկերություններ։

«Այսօրվա փաթեթում առկա են պատժամիջոցներ 60 իրավաբանական անձանց նկատմամբ։ Յուրաքանչյուրի ուղղությամբ մենք կաշխատենք մեր գործընկերների հետ՝ մեր և եվրոպական պատժամիջոցները, ինչպես նաև մյուս ազդեցիկ պետությունների պատժամիջոցները համատեղելու համար։ Փաթեթում ներառված են նաև 73 ֆիզիկական անձինք՝ բոլորը Ռուսաստանի քաղաքացիներ։ Նրանց դեպքում նույնպես պատժամիջոցները կհամաժամեցվեն»,-նշել է Զելենսկին։

Պատժամիջոցների ցուցակում են հայտնվել՝ Ռուսաստանի Արդյունաբերական մայնինգի ասոցիացիան, Кузбасс Майнинг-ը, ВТБ Капитал Трейдинг-ը,Т-Проекты-ը, ПСБ Инновации и инвестиции-ն, ինչպես նաև արտասահմանյան ընկերություններ՝ գրանցված, օրինակ, Կիպրոսում և ԱՄԷ-ում։

Հիշեցնենք՝ հունիսի 21-ին Զելենսկին հայտարարել էր «հատուկ միջոցառումների ամսվա» մեկնարկի մասին, որի նպատակն է ավելացնել ճնշումը Ռուսաստանի վրա։ Բացի Կիևի և նրա դաշնակիցների կողմից սահմանափակումների խստացումից, Ուկրաինայի նախագահը հայտարարել էր, որ լրացուցիչ ռեսուրսներ կուղղվեն տարբեր տեսակի անօդաչու սարքերի զարգացմանը, ինչպես նաև կառավարման թիմում և դիվանագիտական կորպուսում կկատարվեն փոփոխություններ։