08.09.2026 | 12:54
Ֆինլանդիան Ռուսաստանի հետ սահմանին 200 կիլոմետրանոց ցանկապատ է կառուցել
Բալիում լաստանավի խորտակման հետևանքով 4 մարդ է զոհվել, տասնյակները՝ անհետ կորել
Քաղաքականություն
03.07.2025 | 11:51
Գիշերը Ինդոնեզիայի Բալի հանգստավայրային կղզու մոտ լաստանավի խորտակումից հետո փրկարարները որոնում են 32 անհետ կորածի։ Չորս մարմին է հայտնաբերվել։ Առավոտյան եղանակային և ծովային պայմանները բարելավվել են, ինչը կարող է նպաստել հնարավոր ողջ մնացածների որոնմանը, գրում է CNN-ը։
Ըստ Ազգային որոնողական-փրկարարական գործակալության՝ փրկվել է 29 մարդ։ Որոնողական աշխատանքներին մասնակցել են ինը նավակ, ինչպես նաև տեղացի ձկնորսները և ափամերձ բնակիչները։
KMP Tunu Pratama Jaya նավը խորտակվել է չորեքշաբթի ուշ երեկոյան՝ Արևելյան Ճավայի Բանյուվանգի քաղաքի Կետապանգ նավահանգստից դուրս գալուց գրեթե կես ժամ անց, որն ուղևորվում էր դեպի Բալիի Գիլիմանուկ նավահանգիստ՝ 50 կիլոմետր հեռավորությամբ։ Ազգային որոնողական-փրկարարական գործակալության հայտարարության համաձայն՝ լաստանավում եղել է 53 ուղևոր և անձնակազմի 12 անդամ, ինչպես նաև 22 մեքենա, այդ թվում՝ 14 բեռնատար։
Նավահանգստի հերթապահ սպան ականատես է եղել լաստանավի խորտակմանը։
«Սկզբից լաստանավի հետ կապ հաստատել հնարավոր չէր ռադիոկապով։ Այնուհետև կարողացան կապ հաստատել նույն ընկերության այլ նավերը, սակայն նավն արդեն թեքված վիճակում էր։ Մենք այսօր կկենտրոնանանք ջրի վրա որոնողական աշխատանքների վրա, քանի որ առաջին զոհերը հայտնաբերվել են վթարի վայրի և Գիլիմանուկ նավահանգստի միջև ընկած ջրում»,- ասել է Սուրաբայայի որոնողական-փրկարարական գործակալության ղեկավար Նանանգ Սիգիտը։
Բանյուվանգիի ոստիկանության պետ Ռամա Սամտամա Պուտրան ասել է, որ փրկվածներից շատերն անգիտակից վիճակում են եղել՝ ժամերով անհանգիստ ջրերում լողալուց հետո։
Լաստանավերի վթարներ հաճախ են պատահում Ինդոնեզիայում, որն ավելի քան 17,000 կղզիներից բաղկացած կղզեխումբ է, լաստանավերը հաճախ օգտագործվում են որպես տրանսպորտային միջոց, և անվտանգության կանոնները երբեմն չեն պահպանվում։
Թարգմանությունը՝ Էմմա Չոբանյանի
