Վրաստանի խորհրդարանը դադարեցրել է ընդդիմադիր կուսակցության պատգամավորների լիազորությունները

Վրաստանի խորհրդարանը որոշում է ընդունել երկրի նախկին վարչապետ Գիորգի Գախարիայի «Վրաստանի համար» ընդդիմադիր կուսակցության 12 պատգամավորի լիազորությունները վաղաժամկետ դադարեցնելու մասին։ Մասնավորապես, մանդատներից զրկվել են Թեոնա Ակուբարդիան, Անա Բուչուկուրին, Գիորգի Գախարիան, Լևան Գոգիչաիշվիլին, Զազա Թավաձեն, Բեկա Լիլուաշվիլին, Նատիա Մեզվրիշվիլին, Բերդիա Սիչինավան, Կախաբեր Կեմոկլիձեն, Ռոին Կոչորաշվիլին, Դմիտրի Ցկիտիշվիլին, Զվիադ Ձիձիգուրին, գրում է NewsGeorgia-ն։

Պատգամավորական լիազորությունների դադարեցման պատճառը նիստերից բացակայելն է՝ առանց հարգելի պատճառի։

Խորհրդարանի խոսնակ Շալվա Պապուաշվիլին նշել է, որ պատգամավորները չեն մասնակցել գարնանային նստաշրջանի 26 նիստից ոչ մեկին։

Բացի այդ, կանոնակարգի խախտման պատճառով «Վրաստանի համար» կուսակցությունը վեց ամսով զրկվել է պետական ​​ֆինանսավորումից: Պապուաշվիլիի խոսքով՝ կուսակցությունը նոյեմբերին 11-րդ գումարման խորհրդարանի աշխատանքների սկսվելուց հետո բյուջեից ստացել է 800 հազար լարի՝ «օրենսդիր մարմնում մեկ օր անգամ չանցկացնելով»: Օրենքի համաձայն՝ խորհրդարանը պետք է հաստատի «Գախարիան Վրաստանի համար» կուսակցության ցուցակի հաջորդ 12 թեկնածուների խորհրդարանական մանդատները։

2024 թվականի խորհրդարանական ընտրություններից հետո Գախարիայի կուսակցությունը հրաժարվել էր մասնակցել օրենսդրական աշխատանքներին՝ հայտարարելով, որ չի ճանաչում քվեարկության արդյունքները։ Այնուամենայնիվ, ի տարբերություն այլ ընդդիմադիր ուժերի՝ կուսակցության պատգամավորները պաշտոնապես չէին հրաժարվել իրենց մանդատներից կամ հետ չէին կանչել կուսակցական ցուցակը։

Լիազորությունների դադարեցումը տեղի է ունենում Գիորգի Գախարիայի դեմ մեղադրանքների ֆոնին, որն անջատվել է իշխող «Վրացական երազանք»-ից և միացել ընդդիմությանը։

Նա մեղադրյալ է դարձել 2019 թվականին օկուպացիոն գծի մոտ Չորչանա գյուղում ոստիկանական անցակետ տեղադրելու պատճառով դիվերսիայի փորձի վերաբերյալ քրեական գործով։ Այդ ժամանակ Գախարիան զբաղեցնում էր ներքին գործերի նախարարի պաշտոնը։

Թարգմանությունը՝ Էմմա Չոբանյանի