06.10.2026 | 19:45
«Երևան Մոլ»-ից «Շանթ» ու «Արմենիա TV»․ ինչո՞ւ են Դատախազություն կանչել Միքայել Մինասյանին ու կնոջը․ ՏԵՍԱՆՅՈՒԹ
Պուտինը Մակրոնի հետ զրույցում մերժել է Ուկրաինայում հրադադարի հաստատումը
Քաղաքականություն
02.07.2025 | 16:13
ՌԴ նախագահ Վլադիմիր Պուտինը չի փոխել իր դիրքորոշումը Ուկրաինայում լայնածավալ պատերազմի վերաբերյալ և մերժել է ռազմաճակատում հրադադարը Ֆրանսիայի նախագահ Էմանուել Մակրոնի հետ զրույցի ժամանակ։ Այս մասին հաղորդում է ՌԲԿ Ուկրաինան հղում անելով Bloomberg-ին։
Bloomberg-ի աղբյուրների փոխանցմամբ՝ Պուտինի հետ զրույցից հետո Մակրոնը կապ է հաստատել Վլադիմիր Զելենսկիի հետ՝ նրան տեղեկացնելու իր հեռախոսազրույցի մասին։
Ֆրանսիայի նախագահը Զելենսկիին ասել է, որ Պուտինի դիրքորոշումը պատերազմի դադարեցման վերաբերյալ չի փոխվել, և նա շարունակում է մերժել «լռության ռեժիմի» հաստատումը։
Հուլիսի 1-ին Ֆրանսիայի առաջնորդը գրեթե երեք տարվա ընթացքում առաջին անգամ հեռախոսազրույց է ունեցել ՌԴ նախագահի հետ։ Զրույցի ընթացքում կողմերը անդրադարձել էին նաև Ուկրաինայում լայնածավալ պատերազմի թեմային։
Ֆրանսիական կողմի հաղորդմամբ՝ Մակրոնն «ընդգծել է Ֆրանսիայի անսասան աջակցությունը Ուկրաինայի ինքնիշխանությանը և տարածքային ամբողջականությանը» և «կոչ է արել հնարավորինս շուտ հաստատել հրադադար և սկսել բանակցություններ Ուկրաինայի ու Ռուսաստանի միջև՝ հակամարտության ամուր և երկարատև կարգավորման համար»։
Կրեմլի հաղորդագրության համաձայն՝ հեռախոսազրույցի ընթացքում Պուտինն էլ մեղադրել էր Արևմուտքին Ուկրաինայի հակամարտության համար և ասել, որ ցանկացած խաղաղության համաձայնագիր պետք է լինի «երկարաժամկետ»։
Այսօր էլ ճեպազրույցում ՌԴ նախագահի մամուլի խոսնակ Դմիտրի Պեսկովը հայտարարել է, որ Պուտինի ու Մակրոնի միջև հեռախոսազրույցը տևել է ավելի քան երկու ժամ։ Նա նաև նշել է, որ հեռախոսազրույցը տեղի է ունեցել ֆրանսիական կողմի նախաձեռնությամբ։
Թարգմանությունը՝ Էմմա Չոբանյանի
