Բաքվի դատարանը 4 ամսով կալանավորել է «Sputnik Ադրբեջան»-ի աշխատակիցներին

Բաքվի դատարանը «Sputnik Ադրբեջան» լրատվական գործակալության տնօրեն Իգոր Կարտավիխի և աշխատակից Եվգենի Բելոուսովի նկատմամբ որպես խափանման միջոց ընտրել է կալանքը։ Նրանք ձերբակալվել էին երեկ ոստիկանության կողմից գործակալության խմբագրությունում անցկացված գործողության արդյունքում։ Ադրբեջանական լրատվամիջոցների հաղորդմամբ՝ Բաքվի Խաթայի շրջանային դատարանը 4 ամիս ժամկետով կալանք է սահմանել։

Նրանց մեղադրանք է առաջադրվել Ադրբեջանի Քրեական օրենսգրքի 178.3.1, 192.2.2, 192.2.3, 193-1.3.1, 193-1.3.2 հոդվածներով։

Հիշեցնենք, որ Ադրբեջանի Ներքին գործերի նախարարության կողմից նախօրեին «Россия сегодня» լրատվական գործակալության («Sputnik Ադրբեջան») Բաքվի մասնաճյուղում անցկացված օպերատիվ-հետախուզական միջոցառումների արդյունքում ձերբակալվել է 7 անձ։ Ադրբեջանական լրատվամիջոցների հաղորդմամբ՝ հարուցվել է քրեական գործ՝ խարդախության, անօրինական ձեռնարկատիրության և հանցավոր ճանապարհով ձեռք բերված գույքի օրինականացման հոդվածներով։ Կալանավորվել է 2 անձ, ևս 5-ը՝ ենթարկվել քրեական պատասխանատվության։

Մինչ այդ, ՌԴ Եկատերինբուրգում պատվիրված սպանությունների գործով ձերբակալվել է ևս մեկ ադրբեջանցի։ Բաքիր Սաֆարովը չորրորդ կասկածյալն է, որին կալանավորել են նախորդ տարիներին պատվիրված սպանությունների գործով։ Սաֆարովի փաստաբանը հայտնել է, որ իր պաշտպանյալը չի ​​ընդունում մեղադրանքը։ Հունիսի 29-ին դատարանը Այազ, Ակիֆ և Մազահիր Սաֆարովներին կալանավորելու որոշում էր կայացրել։

Հիշեցնենք, որ հունիսի 27-ին Եկատերինբուրգի իրավապահ մարմինների աշխատակիցները ձերբակալել էին 2001, 2010 և 2011 թվականների սպանությունների մեջ կասկածվողներին: Ձերբակալության ընթացքում մահացել են ազգությամբ ադրբեջանցի եղբայրներ Զիյադդին և Հուսեյն Սաֆարովները: Մի քանիսը հոսպիտալացվել են:

Բաքուն պնդում է՝ Եկատերինբուրգում ադրբեջացիները խոշտանգումների են ենթարկվել։ Ադրբեջանի Գլխավոր դատախազությունն էլ առանձնակի դաժանությամբ սպանության վերաբերյալ քրգործ է հարուցել։

Թարգմանությունը՝ Էմմա Չոբանյանի