Թրամփը հայտարարել է, որ Իրանին ոչինչ չի առաջարկում, քանի որ ԱՄՆ-ը ոչնչացրել է երկրի միջուկային օբյեկտները

ԱՄՆ նախագահ Դոնալդ Թրամփը հայտարարել է, որ Իրանին «ոչինչ» չի առաջարկում՝ հավելելով, որ «նույնիսկ չի խոսում» իրանցի պաշտոնյաների հետ՝ երկրի միջուկային օբյեկտներին ԱՄՆ-ի հարվածներից հետո։

«Ասեք կեղծ դեմոկրատ սենատոր Քրիս Կունսին, որ ես Իրանին ոչինչ չեմ առաջարկում՝ ի տարբերություն Օբամայի, որը նրանց միլիարդավոր դոլարներ է վճարել «միջուկային զենքի համապարփակ ծրագրի» (JCPOA) հիմար համաձայնագրի շրջանակում, և ես նույնիսկ չեմ խոսում նրանց հետ, քանի որ մենք ամբողջությամբ ոչնչացրել ենք նրանց միջուկային օբյեկտները»,- գրել է Թրամփը Truth Social-ում։

Իրանի արտաքին գործերի նախարարության խոսնակ Էսմայիլ Բաղային, իր հերթին, հայտարարել է, որ Միացյալ Նահանգները կապ է հաստատել արաբական երկրի միջոցով՝ առաջարկելով հրադադար։ Նա, միաժամանակ, քննադատել է ԱՄՆ-ի և Իսրայելի վարքագիծը՝ դիվանագիտական ​​ջանքերը խաթարելու համար։

«Միացյալ Նահանգները կապ է հաստատել Իրանի հետ արաբական երկրի միջոցով և առաջարկել հրադադար ու ագրեսիվ գործողությունների դադարեցում։ Միացյալ Նահանգների և Իսրայելի գործողությունները ոչնչացրել են դիվանագիտությունը։ Նրանց պարտականությունն է՝ աշխատել Իրանի ժողովրդի վստահությունը վերականգնելու ուղղությամբ»,- ասել է Բաղային։

Նա նաև քննադատել է եվրոպական երկրների դիրքորոշումը Իրանի և Իսրայելի միջև պատերազմի վերաբերյալ՝ ասելով, որ նրանք «փորձել են արդարացնել իսրայելական հարձակումը՝ այն դատապարտելու փոխարեն»։

Ավելի վաղ էլ CNN-ը հայտնել էր, որ Թրամփի վարչակազմը քննարկում է Իրանին մինչև 30 միլիարդ դոլարի հասանելիություն ապահովելու, քաղաքացիական էներգիա արտադրող միջուկային ծրագիր կառուցելու համար պատժամիջոցները մեղմացնելու և իրանական սահմանափակված միջոցներից միլիարդավոր դոլարներ կալանքից հանելու հնարավորությունը։

Թարգմանությունը՝ Էմմա Չոբանյանի