Թուրքիայի ընդդիմության ղեկավարը պահանջով դիմել Էրդողանին

Ստամբուլի թաղամասերից մեկում տեղի է ունեցել «Ժողովրդի կամքը պաշտպանված է» հանրահավաքների արշավի շրջանակներում հերթական բողոքի ակցիան։  Արշավը սկսվել էր CHP-ի՝ Թուրքիայի գլխավոր ընդդիմադիր Ժողովրդհանրապետական կուսակցության նախագահի թեկնածուի և Ստամբուլի քաղաքապետ Էքրեմ Իմամօղլուի ձերբակալությունից հետո, փոխանցում են թուրքական լրատվամիջոցները։ Հավաքի ընթացքում ընթերցվել է բանտարկած Իմամօղլուի գրավոր ուղերձը, իսկ CHP-ի առաջնորդ Օզգյուր Օզելը կոչ է արել Թուրքիայի նախագահ Ռեջեփ Թայիփ Էրդողանին անցկացնել «արտահերթ ընտրություններ»։ Նա նշել է վերջին հարցումների արդյունքները․ «CHP-ն գերազանցում է 40 տոկոսը, իսկ AKP-ն՝ 30 տոկոսից ցածր է։ Ես թույլ չեմ տա, որ դուք նստեք այնտեղ 29 տոկոսով։ Եթե համարձակվում եք կիրակի՝ նոյեմբերի 2-ին, բերեք քվեատուփը»։

Օզելը նաև նշել է․ «Հիմա ես դիմում եմ Էրդողանին, իմ թեկնածուն հստակ է, մենք ուզում ենք քվեատուփ… Մեր ձայնը հստակ է։ Եկեք մեզ մոտ կիրակի՝ նոյեմբերի 2-ին, բերե՛ք քվեատուփ։ Ես թույլ չեմ տա, որ դուք նստեք այնտեղ 29 տոկոսով։ Դուք չեք կարող փախչել ժողովրդից։ Եթե համարձակվում եք, դո՛ւրս եկեք և բերե՛ք քվեատուփը»։

Հիշեցնենք, որ Իմամօղլուն մարտին ձերբակալվել, ապա կալանավորվել է կոռուպցիոն և այլ մեղադրանքներով, որին հետևեցին երկրի տարբեր քաղաքներում հանրահավաքներն ու բողոքի ցույցերը։

Օերերս էլ հաղորդվել էր, որ դատախազները նոր մեղադրանք են առաջադրել Էքրեմ Իմամօղլուին՝ մեղադրելով նրան մարտ ամսին իր ձերբակալությունից առաջ արված արտահայտություններում երկու դատախազներին վիրավորելու մեջ։

Ստամբուլի գլխավոր դատախազության կողմից ներկայացված նոր մեղադրական եզրակացության մեջ նշվում է, որ Իմամօղլուն վիրավորել է մարտի 23-ի իր ձերբակալման միջնորդության մեջ ներգրավված երկու դատախազներին։ Մեղադրանքը նախատեսում է ինը ամսից մինչև չորս տարի ազատազրկում։ Մեղադրողները նաև խնդրել են արգելել Իմամօղլուին զբաղեցնել որևէ պետական ​​պաշտոն՝ հղում անելով Թուրքիայի քրեական օրենսգրքի 53 հոդվածին։ Իմամօղլուն հերքել է մեղադրանքները՝ ասելով, որ իր մեկնաբանություններն ուղղված չեն եղել դատախազների ընտանիքներին կամ անձնական կյանքին, այլ եղել են հանրային շահերից ելնելով արված օրինական քննադատություն: Ստամբուլի քրեական դատարանը ընդունել է մեղադրական եզրակացությունը:

Թարգմանությունը՝ Էմմա Չոբանյանի