ԿՀՎ-ի ղեկավարը հայտարարել է, որ ԱՄՆ-ի և Իսրայելի հարվածները «լուրջ վնաս» են հասցրել Իրանի միջուկային ծրագրին

ԿՀՎ տնօրեն Ջոն Ռատկլիֆը պաշտոնական հայտարարություն է տարածել Իրանի միջուկային ենթակառուցվածքներին հարվածների հետևանքների վերաբերյալ։

«ԿՀՎ-ն կարող է հաստատել, որ հավաստի հետախուզական տվյալների մի ամբողջություն ցույց է տալիս, որ Իրանի միջուկային ծրագիրը լրջորեն վնասվել է վերջին թիրախային հարվածների հետևանքով։ Սա ներառում է պատմականորեն հուսալի և ճշգրիտ աղբյուրից/մեթոդից ստացված նոր հետախուզական տվյալներ, որոնք ցույց են տալիս, որ Իրանի մի քանի կարևոր միջուկային օբյեկտներ ոչնչացվել են և պետք է վերակառուցվեն տարիների ընթացքում»,-ասվում է հայտարարության մեջ։

Նշվում է, որ ԿՀՎ-ն շարունակում է հավաքել լրացուցիչ հուսալի աղբյուրներից ստացված տեղեկատվություն՝ համապատասխան որոշում կայացնողներին և վերահսկող մարմիններին լիովին տեղեկացված պահելու համար։

«Հնարավորության դեպքում մենք նաև կտրամադրենք թարմացումներ և տեղեկատվություն ամերիկյան հանրությանը՝ հաշվի առնելով այս հարցի ազգային կարևորությունը և թափանցիկությունն ապահովելու նպատակով»,-ասվում է հայտարարության մեջ։

Հավելենք, որ CNN-ը և The New York Times-ը  հայտնել էին,  որ ԱՄՆ հետախուզությունը նախնական եզրակացության է եկել՝  Իրանի  միջուկային օբյեկտներին ամերիկյան  հարվածները միջուկային զենքի ստեղծման հարցում Իրանի առաջընթացը հետ են մղել ընդամենը մի քանի ամսով։ ԱՄՆ նախագահ Դոնալդ Թրամփը այս հրապարակումները խիստ քննադատել էր։

Իրանի ԱԳՆ խոսնակ Էսմայիլ Բաղային էլ հայտարարել էր, որ երկրի միջուկային օբյեկտները «լուրջ վնասվել են ԱՄՆ-ի և Իսրայելի հարվածներից»։

Թարգմանությունը՝ Էմմա Չոբանյանի