«Պուտինի տրիբունալ»-ի ստեղծման շուրջ Ուկրաինան և Եվրոպայի խորհուրդը համաձայնագիր են ստորագրել

Ուկրաինայի նախագահ Վլադիմիր Զելենսկին և Եվրոպայի խորհրդի գլխավոր քարտուղար Ալեն Բերսեն համաձայնագիր են ստորագրել Կիևի դեմ ագրեսիայի հանցագործությունները հետաքննելու համար հատուկ տրիբունալ ստեղծելու մասին, հայտնում է Европейская правда-ն։

Ագրեսիայի հանցագործության համար հատուկ տրիբունալ ստեղծելու մասին համաձայնագիրը ստորագրվել է Ստրասբուրգի Եվրոպայի խորհրդի շենքում։ Ապագա հատուկ տրիբունալը թույլ կտա հետաքննություններ անցկացնել պետության բարձրագույն ղեկավարության դեմ, որը սովորաբար պաշտպանված է անձնական անձեռնմխելիությամբ, սակայն դատավճիռ կայացնելը հնարավոր կլինի միայն նրանց՝ պաշտոնները կորցնելուց հետո։

Բացի այդ՝ դատարանը կունենա միջազգային իրավաբանական անձի կարգավիճակ, այլ ոչ թե հիբրիդային կամ ազգային կառույցի կարգավիճակ։ Այն հիմնված է ՄՔԴ-ի Հռոմի կանոնադրության 8 bis հոդվածի վրա։ Ենթադրվում է նաև, որ տրիբունալը կկարողանա դատավճիռներ կայացնել առանց մեղադրյալների ներկայությամբ, օրինակ՝ Ռուսաստանի, Բելառուսի և ԿԺԴՀ-ի քաղաքական և ռազմական ղեկավարության դեմ։

Հիշեցնենք, որ Եվրոպայի խորհրդի նախարարների կոմիտեն  հատուկ տրիբունալի ստեղծման իրավական ընթացակարգը մեկնարկել էր մայիսի 14-ին։ Մինչ այդ՝ գործընթացը քաղաքական հավանություն էր ստացել Լվովում մայիսի 9-ին կայացած հատուկ գագաթնաժողովում։

Հավելենք, որ այս դատարանը հաճախ անվանում են «Պուտինի տրիբունալ», քանի որ ենթադրվում է, որ Ռուսաստանի նախագահ Վլադիմիր Պուտինը կճանաչվի Ուկրաինայի դեմ պատերազմի պատասխանատու անձանցից մեկը։

Ավելի վաղ էլ Euronews-ը, վկայակոչելով եվրոպացի պաշտոնյաներին հայտնել էր, որ հատուկ տրիբունալը չի կարող Վլադիմիր Պուտինի դեմ հեռակա դատաքննություն սկսել, քանի դեռ նա զբաղեցնում է ՌԴ նախագահի պաշտոնը։ Ռուսաստանի վարչապետ Միխայիլ Միշուստինը և արտգործնախարար Սերգեյ Լավրովը նույնպես անձեռնմխելիություն ունեն։

Թարգմանությունը՝ Էմմա Չոբանյանի