24.06.2026 | 12:19
Անկարան բարձր է գնահատում Բաքվի ու Երևանի միջև բանակցային գործընթացը․ Թուրքիայի խորհրդարանի նախագահ
Իսրայելը հարվածել է Իրանի չորս շրջաններում գտնվող ռազմական օբյեկտների
Քաղաքականություն
22.06.2025 | 21:22
Իսրայելի պաշտպանության բանակը (ՑԱՀԱԼ) կիրակի օրը՝ հունիսի 22-ին, հարվածներ է հասցրել Իրանի չորս շրջաններում գտնվող հրթիռային և անօդաչու սարքերի օբյեկտներին՝ Սպահան, Բուշեր, Ահվազ և Յազդ քաղաքներում, ինչպես հայտնել են իսրայելական զինվորականները։
Ընդհանուր առմամբ, Իսրայելի ռազմաօդային ուժերի մոտ 30 կործանիչներ հարձակվել են Իրանի տարածքում գտնվող տասնյակ ռազմական թիրախների վրա՝ արձակելով ավելի քան 60 ռազմամթերք, ասվում է ՑԱՀԱԼ-ի հաղորդագրության մեջ։ Հարվածի ենթարկված օբյեկտների թվում է նաև «Իմամ Հուսեյն» հրամանատարական կենտրոնը Եզդի շրջանում, որտեղ պահվում երկար հեռահարության հրթիռներ։ Իսրայելի զինվորականների պնդմամբ՝ այդ կենտրոնից Իսրայելի ուղղությամբ արձակվել է շուրջ 60 հրթիռ։
Իսրայելի օդային գործողությունների վարչության ղեկավար Գիլադ Կեյնանի խոսքերով՝ սա մինչ այժմ Իսրայելի ռազմաօդային ուժերի կողմից խոցված ամենահեռու թիրախն է Իրանում՝ գտնվելով Իսրայելից 2200 կմ հեռավորության վրա։
Սպահանում, Բուշերում և Ահվազում հարվածները հասցվել են ռազմական օբյեկտների, որոնք ներգրավված են հակաօդային պաշտպանության համակարգերի արտադրության մեջ, ինչպես նաև անօդաչու թռչող սարքերի «Երրորդ բրիգադի» հրամանատարական կենտրոնին և դրա մոտ գտնվող անօդաչու սարքերի պահեստին, նշվում է ՑԱՀԱԼ-ի հաղորդագրության մեջ։
Հիշեցնենք՝ ԱՄՆ նախագահ Դոնալդ Թրամփը ավելի վաղ հայտարարել է, որ ամերիկյան ավիացիան հարվածներ է հասցրել Իրանում գտնվող երեք միջուկային օբյեկտներին՝ Ֆորդոյում, Նաթանզում և Սպահանում։
Ամերիկայի նախագահը նաև ուղերձով է հանդես եկել։ Իր ելույթում, որը տևել է երեք րոպե, Թրամփն ասել է, որ Իրանի ապագան կամ խաղաղություն է, կամ ողբերգություն, և կան բազմաթիվ այլ թիրախներ, որոնք կարող են խոցվել ամերիկացի զինվորականների կողմից: Նա հայտարարել է, որ եթե խաղաղության գործընթացն արագ տեղի չունենա, ապա ԱՄՆ-ն այլ նպատակներ է հետապնդելու՝ ճշգրտությամբ, արագությամբ և հմտությամբ:
