Հունգարիան Իրանից իր դեսպանատունն է տեղափոխել է Ադրբեջան, Բուլղարիան էլ՝ դեսպանատան անձնակազմին

Հունգարիան իր քաղաքացիներին Իրանից տարհանել է Ադրբեջան և ժամանակավորապես Թեհրանից այստեղ  է տեղափոխել իր դեսպանատունը։ Այս մասին հայտարարել է Հունգարիայի արտաքին գործերի նախարար Պետեր Սիյարտոն, գրում են ադրբեջանական լրատվամիջոցները։

«Մերձավոր Արևելքում մարտական ​​գործողությունները սրվում են, ուստի Իրանում բնակվող մի քանի հունգարացի քաղաքացիներ խնդրել են մեզ դուրս բերել իրենց այնտեղից», – ասել է Սիյարտոն։

Նա նշել  է, որ դիվանագետներն ու նրանց ընտանիքի անդամները դուրս են բերվել Իրանից և ժամանակավորապես տեղավորվել Ադրբեջանում։

«Դեսպանատան աշխատակիցներն ու նրանց ընտանիքի անդամները, ընդհանուր առմամբ տասնհինգ մարդ, այդ թվում՝ երեխաներ, մեկնել են Ադրբեջան, ուստի Թեհրանում դեսպանատան աշխատանքը ժամանակավորապես կիրականացվի այնտեղից մինչև անվտանգության պայմանների բարելավումը», – ասել է Սիյարտոն։

Բուլղարիան փակել է իր դեսպանատունը Իրանում և տարհանել է դիվանագիտական ​​անձնակազմին ու նրանց ընտանիքներին Ադրբեջան՝ Թեհրանի և Իսրայելի միջև աճող լարվածության պատճառով։

Այս մասին հայտարարել է Բուլղարիայի վարչապետ Ռոսեն Ժելյազկովը։

Նրա խոսքով՝ որոշումը կայացվել է այն բանից հետո, երբ Իսրայելը խորհուրդ է տվել բնակիչներին լքել Թեհրանի երրորդ շրջանը։ Հենց այս շրջանի մոտակայքում էր գտնվում Բուլղարիայի դեսպանատունը։

«Մեր դեսպանատունը գտնվում է այս շրջանի մոտակայքում, և մենք որոշել ենք, որ մեր դիվանագետները կլքեն երկիրը։ Դեսպանատունը կշարունակի աշխատել Բաքվից», – հայտարարել է Ժելյազկովը։

Թարգմանությունը՝ Էմմա Չոբանյանի