Ադրբեջանի ՊՆ ղեկավարը Բելառուս այցի ընթացքում այցելել է պաշտպանական ձեռնարկություն

Ադրբեջանի ՊՆ ղեկավար Զաքիր Հասանովը Բելառուս կատարած պաշտոնական այցի շրջանակներում այցելել է Ռազմաօդային ուժերի և ՀՕՊ զորքերի կենտրոնական հրամանատարական կետ։ Այս մասին հայտնում է Ադրբեջանի ՊՆ-ն։

Իր հերթին, Բելառուսի պաշտպանության նախարարության մամուլի ծառայությունը հայտնում է, որ Հասանովին ցուցադրվել են բելառուսական ՀՕՊ համակարգերի հնարավորությունները։

«Ադրբեջանի պաշտպանության նախարարության ղեկավարը նաև եղել է Բելառուսի տնտեսության պաշտպանական ոլորտի ձեռնարկությունում», – ասվում է հայտարարարության մեջ։

Հավելենք, որ նախօրեին Զաքիր Հասանովը Մինսկում բանակցություններ էր անցկացրել իր բելառուս գործընկեր, գեներալ-լեյտենանտ Վիկտոր Խրենինի հետ։
Բանակցությունների ընթացքում կողմերը քննարկել էին երկկողմ ռազմական համագործակցության ներկայիս վիճակը և նախանշել այն ակտիվացնելու ուղիները փոխադարձ հետաքրքրություն ներկայացնող ոլորտներում։
Հասանովը նշել էր, որ Ադրբեջանը բարձր է գնահատում Բելառուսի հետ ռազմական և ռազմատեխնիկական համագործակցությունը և նպատակ ունի նաև խորացնել այն։

Բելառուսի պաշտպանության նախարարն էլ իր հերթին ընդգծել էր, որ Ադրբեջանի հետ համագործակցությունը բնութագրվում է «վստահության և բաց լինելու բարձր մակարդակով»։
«Բելառուսի և Ադրբեջանի միջև համագործակցությունը բաց է և աչքի է ընկնում բազմակողմանի երկխոսության բարձր մակարդակով։ Դրա լավագույն ապացույցը երկու երկրների նախագահներ Ալեքսանդր Լուկաշենկոյի և Իլհամ Ալիևի միջև բարեկամական և վստահելի հարաբերություններն են։ Եվս մեկ անգամ կցանկանայի ընդգծել մեր երկկողմ հարաբերությունների բարձր մակարդակը ռազմական ոլորտում, և ամենակարևորը՝ առկա փոխադարձ հետաքրքրությունը և դրանց հետագա խորացման ներուժը»,-ասել էր նա։

Թարգմանությունը՝ Էմմա Չոբանյանի