Քաղաքականություն
18.06.2025 | 11:55
Ռուսական զորքերը լույս հունիսի 18-ի գիշերը «Շահեդ» ԱԹՍ-ներով հարվածներ են հասցրել, որոնց հետևանքով Զապորոժիեում հրդեհներ են բռնկվել։ Այս մասին հայտնում են տեղական իշխանությունները։ Կիևում էլ փրկարարները շարունակում են փլատակներից դուրս բերել զոհվածների մարմինները. նրանց թիվը հասել է 22-ի, փոխանցում է Current time-ը։
Զապորոժիեի մարզային վարչակազմի ղեկավար Իվան Ֆեդորովը հայտնել է, որ ռուսական անօդաչու թռչող սարքերի գիշերային հարվածից մարզկենտրոնում հրդեհներ են բռնկվել։
«Գիշերը թշնամին քաղաք է ուղարկել տասներեք անօդաչու թռչող սարք։ Հարձակման հետևանքով բռնկվել է երեք հրդեհ՝ 100, 300 և 800 քառակուսի մետր մակերեսով», – գրել է Ֆեդորովն իր տելեգրամի ալիքում։
Ֆեդորովի խոսքով՝ ավերվել են պահեստներ, այրվել են մեքենաներ, կոտրվել են բազմահարկ բնակելի շենքերի պատուհաններ։ Նա չի մանրամասնել, թե «Շահեդները» ինչ թիրախների վրա են հարձակվել։ Նրա խոսքով՝ տուժածներ չկան։
Կիևում էլ փրկարարները Սոլոմենսկի շրջանում բազմահարկ շենքի փլատակներից դուրս են բերել ևս հինգ մարդու մարմին։ Այս մասին հայտնել է Ուկրաինայի արտակարգ իրավիճակների պետական ծառայությունը։ Այսպիսով՝ զոհերի թիվը հասել է 22-ի (134 մարդ վիրավորվել է)։ Որոնողական-փրկարարական աշխատանքները վթարի վայրում դեռևս շարունակվում են։
«Սոլոմենսկի շրջանում մասամբ ավերված ինը հարկանի շենքի փլատակներից դուրս են բերվել ևս երեք զոհերի մարմիններ։ Նշված հասցեից դուրս է բերվել ընդհանուր առմամբ 11 մարմին», – հայտնել էին փրկարարները։
Հիշեցնենք, որ լույս հունիսի 17-ի գիշերը ռուսական զորքերը զանգվածային հարված էին հասցրել Կիևին ԱԹՍ-ներով ու հրթիռներով։
Թարգմանությունը՝ Էմմա Չոբանյանի
