07.08.2026 | 23:37
Անձրև, ամպրոպ և ջերմաստիճանի նվազում. առաջիկա օրերի եղանակի կանխատեսումը
ՌԴ-ն ԱԹՍ-ներով ու հրթիռներով հարվածել է Կիևին․ 14 մարդ զոհվել է, կա շուրջ 100 վիրավոր
Քաղաքականություն
17.06.2025 | 13:13
Ռուսական զորքերը գիշերը անօդաչու թռչող սարքերով և հրթիռներով հարվածել են Կիևին։ Առնվազն 14 մարդ զոհվել է, շուրջ 100-ը՝ վիրավորվել, հայտնում են տեղական իշխանությունները, գրում է Current time-ը։ Տուժել են Ուկրաինայի մայրաքաղաքի առնվազն 12 շրջաններ։ Սոլոմենսկի շրջանում ավերվել է բնակելի շենքի մուտքը, փրկարարներն աշխատում են այնտեղ՝ մաքրելով փլատակները։
«Զոհերի թիվը հասել է 14-ի։ Այս պահի դրությամբ Կիևում վիրավորվել է 44 մարդ։ Եվս 6-ը վիրավորվել է Օդեսայում, իսկ 1 մարդ վիրավորվել է Կիևի և Չեռնիգովի մարզերում», – իր տելեգրամ ալիքում ասել է Ուկրաինայի Ներքին գործերի նախարարության ղեկավար Իգոր Կլիմենկոն։ Ավելի ուշ նա հավելել է, որ վիրավորների թիվը հասել է 60-ի։
Կիևի քաղաքային ռազմական վարչակազմի ղեկավար Տիմուր Տկաչենկոն էլ հայտնել է շուրջ 100 վիրավորի մասին։
«Մինչ այժմ մենք հաստատ գիտենք Կիևի վրա ռուսական հարձակման հետևանքով 99 տուժածի մասին։ 59-ը հոսպիտալացվել է։ Միաժամանակ տեղեկություններ են ստացվում, որ արդեն գրանցվել է 104 տուժած։ Մենք ստուգում ենք»,- նշել է նա։
Կիևի Դարնիցկի շրջանում ռուսական հարվածից հետո խոշոր հրդեհ է բռնկվել, որը մարվում է ուղղաթիռի միջոցով։ Հարվածի հետևանքով վնասվել են նաև Կիևի ավիացիոն ինստիտուտի հանրակացարանները։
Տկաչենկոն նաև հայտնել է, որ ՌԴ-ն օգտագործել է 175 անօդաչու թռչող սարք, ավելի քան 14 թևավոր հրթիռ և առնվազն 2 բալիստիկ հրթիռ։
Օդեսայի մարզային վարչակազմի ղեկավար Օլեգ Կիպերն էլ հայտնել է, որ Օդեսային ռուսական անօդաչու թռչող սարքի հարվածից հետո հոսպիտալացվել է 13 վիրավոր։ Նրա խոսքով՝ փլատակների տակ դեռ կարող են մարդիկ լինել։
Ուկրաինայի նախագահ Վլադիմիր Զելենսկին էլ հայտնել է, որ ՌԴ-ն գրոհել է ավելի քան 440 ԱԹՍ-ով։
«Ավելի քան 440 անօդաչու թռչող սարք և 32 հրթիռ։ Կիևի վրա ամենասարսափելի հարվածներից մեկը», – տելեգրամում գրել է Զելենսկին։ Նրա խոսքով՝ ռուսական զորքերը հարձակվել են նաև Օդեսայի, Զապորոժիեի, Չեռնիգովի, Ժիտոմիրի, Կիրովոգրադի, Նիկոլաևի և Կիևի մարզերի վրա։ Զելենսկիի խոսքով՝ հայտնի է 15 զոհի և 75 վիրավորի մասին։
Թարգմանությունը՝ Էմմա Չոբանյանի
