16.09.2026 | 19:37
Եվրոպա լիգա․ «Արարատ-Արմենիայի» մեկնարկային կազմը «Սպարտա Պրահայի» դեմ խաղում
Իրանում հրթիռակոծության հետևանքով փշրվել են հայկական «Ալիք» օրաթերթի պատուհանի ապակիները
Քաղաքականություն
15.06.2025 | 22:24
Իսրայելի զինված ուժերի արձակած հրթիռներից մեկը պայթել է հայկական «Ալիք» օրաթերթի խմբագրության հարակից տարածքում։ Օրաթերթի գլխավոր խմբագիր Արամ Շահնազարյանը Factor.am-ին հայտնեց, որ պայթյունի ալիքից խմբագրության պատուհանների ապակիները փշրվել են, շենքը որևէ այլ վնաս չի կրել։
«Վայրագ, անմարդկային հարձակում էր, այդ շենքն, որի ուղղությամբ եղել է հարվածը, ամբողջությամբ փլուզվել է, խաղաղ բնակչության շրջանում զոհեր կան։ Խմբագրության անձնակազմից, բարեբախտաբար, ոչ ոք չի տուժել, թեթևակի վիրավորներ էլ չենք ունեցել, որովհետև աշխատակազմն այդ ժամին այնտեղ չի եղել, բայց եթե լիներ էլ, որևէ մեկը վնաս չէր կրելու», – ասաց Շահնազարյանը։
Նրա խոսքով` օրաթերթի տպագիր տարբերակը մի քանի օր չի տպագրվի, քանի որ պայթյունից վնասվել է նաև ինտերնետ կապը։ Ըստ Շահնազարյանի` վաղվանից կսկսեն վնասը վերականգնել, մինչ այդ աշխատում է «Ալիք» օրաթերթի կայքէջն ու ինստագրամյան էջը։
Հիշեցնենք, որ Իսրայելը հունիսի 13-ի վաղ առավոտից հարվածներ էր հասցրել Իրանի տարածքին՝ թիրախավորելով Իրանի ռազմական և միջուկային օբյեկտները։
Ավելի ուշ Իրանը պատասխանել էր՝ Իսրայելի ուղղությամբ հրթիռային հարվածների ալիքներ հասցնելով։ Կողմերը շարունակում են փոխադարձ հարվածներ հասցնել միմյանց։
Անի Թամրազյան
Լուսանկարը՝ 301 Հայերեն ֆեյսբուքյան էջի։
