«Թեհրան տանող ճանապարհը հարթված է». Իսրայելի պաշտպանության բանակը հայտարարել է՝ ՌՕ ուժերը ազատորեն կգործեն Իրանի մայրաքաղաքի վրայով

Իսրայելի պաշտպանության բանակը շարունակում է հարվածներ հասցնել Իրանին։ Գիշերը մի շարք հարվածներ ոչնչացրել են ՀՕՊ համակարգերը, իսկ այսօր առավոտյան Իսրայելի պաշտպանության բանակի շտաբի պետ, գեներալ-լեյտենանտ Էյալ Զամիրը հայտարարել է, որ «Թեհրան տանող ճանապարհը հարթված է»․ գրում է The Times of Israel-ը։

Իսրայելի պաշտպանության բանակը հայտարարել է, որ հարվածները կշարունակեն թիրախավորել Իրանի միջուկային օբյեկտները, ռազմական օբյեկտները և բալիստիկ հրթիռներ արձակող կայանները, ինչպես նաև զինվորական բարձրաստիճան պաշտոնյաներին և միջուկային գիտնականներին։

Նշվում է, որ Իսրայելի կողմից ուրբաթ առավոտյան գործողության սկսվելուց ի վեր հարված է հասցվել ավելի քան 150 թիրախի։

Իսրայելի պաշտպանության նախարար Իսրայել Կացը զգուշացրել է Իրանի հոգևոր առաջնորդ Ալի Խամենեիին, որ եթե  շարունակվեն հրթիռներ արձակվել Իսրայելի վրա, ապա «Թեհրանը կայրվի»։

«Եթե Խամենեին շարունակի հրթիռներ արձակել Իսրայելի ներքին ճակատի վրա, Թեհրանը կայրվի», – զգուշացրել է Կացը։

Հիշեցնենք, որ Իսրայելը հունիսի 13-ի վաղ առավոտյան հարձակվել է Իրանի վրա։ Հարվածների ժամանակ նահատակվել են Իրանի զինված ուժերի շտաբի պետ, գեներալ-մայոր Մոհամմադ Հոսեյն Բաքերին, Իսլամական հեղափոխության պահապանների կորպուսի հրամանատար, գեներալ-մայոր Հոսեյն Սալամին, Իրանի «Խաթամ ​​ալ-Անբիա» կենտրոնական շտաբի հրամանատար, գեներալ-մայոր Ղոլամ Ալի Ռաշիդը, ԻՀՊԿ-ի ավիատիեզերական ուժերի հրամանատար, գեներալ-մայոր Ամիր Ալի Հաջիզադեն և առնվազն վեց իրանցի միջուկային գիտնականներ։ Մահացել է Իրանի 78 քաղաքացի, վիրավորվել 320-ը։

Իրանն ի պատասխան հրթիռային երեք հարձակում է գործել Իսրայելի վրա։ Իսրայելը հայտնել է 4 զոհի և 70-ից ավելի վիրավորների մասին, ինչպես նաև Թել Ավիվում ու Ռամաթ Գանում ավերածությունների ու շինությունների փլուզումների մասին։ Նշվում է, որ փլատակների տակ մարդիկ կան։

Թարգմանությունը՝ Անահիտ Խաչատրյանի