Վրաստանում կալանավորվել է ընդդիմադիր Նիկա Գվարամիան

Վրաստանի ընդդիմադիր «Փոփոխությունների համար կոալիցիայի» առաջնորդ Նիկա Գվարամիան կալանավորվել է։ Նա Ռուսթավիի թիվ 12 քրեակատարողական հիմնարկ ինքնուրույն է գնացել։

Ավելի վաղ Թբիլիսիի քաղաքային դատարանը փոխել էր Գվարամիայի նկատմամբ խափանման միջոցը. գրավի փոխարեն նրա նկատմամբ խափանման միջոց էր ընտրվել կալանքը։ Որոշումը կայացրել է դատավոր Ջվեբե Նաչկեբիան։

Ընդդիմադիր գործչին նախկինում 30,000 լարի գրավ էր նշանակվել վիճահարույց խորհրդարանական հանձնաժողովի նիստին չներկայանալու պատճառով, որը Գվարամիան հրաժարվել էր վճարել: Գրավի վճարման վերջնաժամկետը լրացել էր հունիսի 7-ին։

Քաղաքական գործիչն ինքը չէր ներկայացել այսօրվա դատական ​​նիստին:

«Գործը շինծու է և հարուցված է բոլոր այն քաղաքական գործիչների դեմ, որոնք չեն ներկայացել հանձնաժողովին, որն իրականում ստեղծվել է Սահմանադրությանը հակառակ։ Ես ենթարկվում եմ Վրաստանի Սահմանադրությանը, այլ ոչ թե «երազանքի» Սահմանադրությանը»,- ավելի վաղ լրատվամիջոցների ներկայացուցիչների հետ զրույցում հայտարարել էր Գվարամիան։

Ավելի ուշ լրատվամիջոցները հայտնել էին, որ Գվարամիան ժամանել է Ռուսթավիի թիվ 12 քրեակատարողական հիմնարկ։

Նմանատիպ գործով արդեն կալանավորվել են երեք քաղաքական գործիչներ, այդ թվում՝ «Ախալի» կուսակցության համահիմնադիր Նիկա Մելիան, նախկին պաշտպանության նախարար Իրակլի Օքրուաշվիլին և «Գիրչի» կուսակցության առաջնորդ Զուրաբ Ջափարիձեն։ Նրանց բոլորի նկատմամբ որպես խափանման միջոց է ընտրվել գրավը՝ խորհրդարանական քննչական հանձնաժողովին չներկայանալու պատճառով, և տրվել է 50 օր՝ այն կիրառելու համար։

Խորհրդարանական հանձնաժողովի նպատակն է հետաքննել պաշտոնյաների կողմից 2003-2012 թվականներին՝ նախկին նախագահ Միխեիլ Սաակաշվիլիի կառավարման տարիներին կատարված հանցագործությունները։

Թարգմանությունը՝ Էմմա Չոբանյանի