07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Ադրբեջանի SOCAR-ն ու Գերմանիայի պետական SEFE-ն բնական գազի մատակարարման տասնամյա պայմանագիր են ստորագրել
Քաղաքականություն
10.06.2025 | 22:50
Ադրբեջանի պետական նավթային ընկերությունը՝ SOCAR-ը և Գերմանիայի SEFE (Securing Energy for Europe) պետական էներգետիկ ընկերությունը բնական գազի մատակարարման տասնամյա պայմանագիր են ստորագրել։ Այս մասին հայտնում են ադրբեջանական լրատվամիջոցները՝ վկայակոչելով SOCAR-ին։
Փաստաթղթի համաձայն՝ SEFE-ի համար Եվրոպայում գազի ծավալները կմատակարարի SOCAR-ը։
Հաղորդվում է, որ տարեկան մատակարարման ծավալը փուլ առ փուլ կավելացվի մինչև 15 տերավատտ ժամ (TWh), որը համարժեք է մոտավորապես 1,5 միլիարդ խորանարդ մետր բնական գազի։
«Այս համագործակցությունը կնպաստի Եվրոպա խողովակաշարային գազի մատակարարումների ավելացմանը՝ աջակցելով արտադրության և ենթակառուցվածքների, այդ թվում՝ գազային կոմպրեսորային կայանների ներդրումներին, այդպիսով նպաստելով մայրցամաքի էներգետիկ անվտանգությանը»,- ասվում է SOCAR-ի հայտարարության մեջ։
SEFE-ի գործադիր տնօրեն Էգբերտ Լեգեն էլ նշել է, որ այս երկարաժամկետ պայմանագիրը Գերմանիայի և Ադրբեջանի միջև ամուր հարաբերությունների հստակ օրինակ է։
SOCAR-ի նախագահ Ռովշան Նաջաֆն իր հերթին ընդգծել է, որ այս համաձայնագիրը SOCAR-ի գործունեության ևս մեկ կարևոր փուլ է՝ ուղղված Եվրոպայի էներգետիկ անվտանգության ամրապնդմանը։
«SEFE-ին հուսալի և մեծ ծավալի բնական գազ մատակարարելով՝ մենք ավելի ենք ամրապնդում Ադրբեջանի և Գերմանիայի միջև առկա գործընկերությունը՝ նպաստելով Եվրոպայի դիվերսիֆիկացման և կայուն զարգացման նպատակներին։SOCAR-ը կշարունակի ներդրումներ կատարել ենթակառուցվածքային և արտադրական նախագծերում՝ ապահովելով իր գործընկերների համար հուսալի և անխափան էներգամատակարարում»,- հայտարարել է նա։
Թարգմանությունը՝ Էմմա Չոբանյանի
