08.09.2026 | 10:31
Պապոյանը Դուբայում քննարկել է հայկական կառուցապատման ոլորտը միջազգային հարթակներում ներկայացնելու հնարավորությունները
Զելենսկին հայտնել է, որ ՌԴ-ն Ուկրաինայի վրա հարձակման համար կիրառել է ավելի քան 400 ԱԹՍ և 40 հրթիռ
Քաղաքականություն
06.06.2025 | 15:17
Ուկրաինայի նախագահ Վլադիմիր Զելենսկին անդրադարձել է ռուսական ուժերի կողմից գիշերային հարձակմանը։
«Ռուսաստանը չի փոխում իր ոճը։ Եվս մեկ լայնածավալ հարված քաղաքներին և առօրյա կյանքին։ Նրանք հարվածել են գրեթե ամբողջ Ուկրաինային՝ Վոլինի, Լվովի, Տերնոպոլի, Կիևի, Սումիի, Պոլտավայի, Խմելնիցկիի, Չերկասի և Չեռնիգովի մարզերին։ Հրթիռներից և անօդաչու սարքերից մի քանիսը խփվել են»,- գրել է Զելենսկին տելեգրամի իր ալիքում։
Նա հայտնել է, որ, ընդհանուր առմամբ, հարվածի ժամանակ օգտագործվել է ավելի քան 400 անօդաչու թռչող սարք և ավելի քան 40 հրթիռ, այդ թվում՝ բալիստիկ։
«Վիրավորվել է 49 մարդ։ Ցավոք, թիվը կարող է աճել. մարդիկ օգնություն են խնդրում։ Մահացել է երեք մարդ։ Նրանք Ուկրաինայի պետական արտակարգ իրավիճակների ծառայության աշխատակիցներ են։ Բոլոր անհրաժեշտ ծառայությունները ներկայում աշխատում են տեղում, մաքրում են փլատակները, փրկարարական գործողություններ են ընթանում։ Մենք անպայման կվերականգնենք բոլոր վնասները»,- նշել է Ուկրաինայի նախագահը։
Նա հայտարարել է, որ Ռուսաստանը պետք է պատասխանատվություն ստանձնի հարվածների համար։
«Մենք աշխարհի հետ միասին շատ բան ենք արել՝ մեզ պաշտպանելու հնարավորություն ունենալու համար։ Բայց հիմա այն պահն է, երբ Ամերիկան, Եվրոպան և աշխարհում բոլորը միասին կարող են դադարեցնել այս պատերազմը՝ ճնշում գործադրելով Ռուսաստանի վրա։ Եթե ինչ-որ մեկը ճնշում չի գործադրում և պատերազմին ավելի շատ ժամանակ է տալիս՝ կյանքեր խլելու համար, դա հանցակցություն և պատասխանատվություն է»,- գրել է Զելենսկին և վճռականորեն գործելու կոչ արել։
Հիշեցնենք, որ ավելի վաղ Կիևի քաղաքապետ Վիտալի Կլիչկոն հայտնել էր Ուկրաինայի մայրաքաղաքում ռուսական անօդաչու թռչող սարքերի և հրթիռային հարվածի հետևանքով չորս մարդու մահվան մասին։
Թարգմանությունը՝ Էմմա Չոբանյանի
