15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Ռուսական զորքերն ԱԹՍ-ներով ու հրթիռներով գրոհել են Ուկրաինան․Կիևում զոհվել է 4, վիրավորվել՝ 16 մարդ
Քաղաքականություն
06.06.2025 | 11:01
Ռուսական զորքերը բալիստիկ հրթիռներով և անօդաչու թռչող սարքերով գրոհել են Կիևը։ Այս մասին հայտնում է Ուկրաինայի պետական արտակարգ իրավիճակների ծառայությունը։ Կիևի քաղաքապետ Վիտալի Կլիչկոն հայտնել է, որ հարձակման հետևանքով զոհվել է չորս մարդ, ևս 16-ը՝ վիրավորվել:
Ուկրաինայի ներքին գործերի նախարար Իգոր Կլիմենկոն հայտնել է, որ հարվածներից մեկի հետևանքով երեք փրկարար է զոհվել, որոնք աշխատելիս են եղել մարդկանց օգնելու համար։ Եվս ինը փրկարար վիրավորվել է։ Ընդհանուր առմամբ տուժել է 40 մարդ։
Պետական արտակարգ իրավիճակների ծառայության տվյալներով՝ Կիևի Սոլոմենսկի շրջանում տեղի ունեցած հարձակման հետևանքով հրդեհ է բռնկվել 16 հարկանի բնակելի շենքի 11-րդ հարկում, Գոլոսեևսկի շրջանում հրդեհ է բռնկվել քաղաքացիական ենթակառուցվածքների օբյեկտում։
Նշվում է, որ վնասվել են «Դարնիցա» և «Լևոբերեժնայա» կայարանների միջև գտնվող մետրոյի գծերը։ Բացի այդ՝ ռուսական բանակը հարվածներ է հասցրել Ուկրաինայի արևմուտքում գտնվող Լուցկ և Տերնոպոլ քաղաքներին։
Լուցկի քաղաքապետ Իգոր Պոլիշչուկի խոսքով՝ ռուս զինվորականներն արձակել են 15 ԱԹՍ և վեց հրթիռ։ Քաղաքում մի քանի պայթյուններ են տեղի ունեցել, և գործել է հակաօդային պաշտպանությունը։
«Բնակելի շենքերից մեկի տանիքը վնասվել է, կան բազմաթիվ կոտրված պատուհաններ, վնասվել են առևտրային օբյեկտներ և անձնական մեքենաներ», – ասել է քաղաքապետը։ Նրա խոսքով՝ վիրավորվել է հինգ մարդ, զոհվածների մասին տեղեկություններ չկան։
Տերնոպոլի քաղաքապետ Սերգեյ Նադալի խոսքով՝ հարվածներ են հասցվել արդյունաբերական օբյեկտներին և ենթակառուցվածքներին։ Համապատասխան ծառայությունները տեղում աշխատում են։
«Տերնոպոլի մի մասը էլեկտրաէներգիա չունի։ Քաղաքում ջրի ճնշումը նվազել է էլեկտրաէներգիայի անջատումների պատճառով։ Վերին հարկերում ճնշում կարող է չլինել։ Վերականգնողական աշխատանքներ են ընթանում», – հայտարարել է Նադալը։
Ռուսական կողմը հարվածները դեռ չի մեկնաբանել։
Թարգմանությունը՝ Էմմա Չոբանյանի
