Ուրախ լուր հայտնելու տեղ չունենք. Միրզոյանը` գերիների վերադարձի մասին․ ՏԵՍԱՆՅՈՒԹ

Գերիների և ապօրինի պահվող անձանց հարցը և ընդհանրապես՝ հումանիտար հարցերը մեծ օրակարգի կարևոր, ցավոտ մասն են, և երևի եզակի հարցերից են, որ ընդհանրապես կառուցողական խոսակցություն չի ստացվում ունենալ, լրագրողների հետ զրույցում ասաց ԱԳ նախարար Արարատ Միրզոյանը։

«Վերջին բանը, որ շոշափելի է եղել, գերիների մեծ փոխանակությունն էր, դրանից հետո չի ստացվել, և այստեղ ուրախ լուրեր հայտնելու տեղ չունենք»,-ասաց նա։

Ըստ Միրզոյանի, եթե հաջողվի վերջանական ստորագրված խաղաղության փաստաթուղթ ունենալ, այդ հարցի լուծման համար բարենպաստ միջավայր կլինի։

Անդրադառնալով սահմանային կրակոցներին, Միրզոյանը նշեց, որ անշուշտ, մտահոգիչ են։

«Այդ կրակոցները քննելու պատրաստակամություն կա մեր կողմից, ինչ-որ դրվագով կարող ենք ասել՝ նաև ադրբեջանական կողմից։ Այդ ուղղությամբ աշխատանքներ տարվում են։ Բայց որպեսզի բավարար չափով ամեն ինչ պարզվի և բավարար չափով ասենք, որ վաղն էլ չի լինի, ցավոք սրտի, չենք կարող»,-ասաց նա։

Միրզոյանը նշեց, որ ադրբեջանական կողմին տեղեկացնում են կրակոցների մասին նաև փաստական տվյալներով, որ այդ կրակոցներն Ադրբեջանից են։ Բայց Ադրբեջանն էլ հակառակն է պնդում։

«Հրապարակային անդրադարձներով և հանդիպումներին ասում են՝ չէ, մենք չենք կրակում, դուք եք կրակում։ Մենք էլ ասում ենք՝ դե դուք տվեք փաստական ապացույցներ, և առաջարկում ենք ձևավորել համատեղ հետաքննող մեխանիզմ՝ մասնագետների կողմից, որոնք կկարողանան մոտենալ կոնկրետ վայր ու փորձել հանգամանքներն ուսումնասիրել։ Հիմա խոսակցություն ադրեբաջնական կողմից ունենք, որոշակի ըմբռնում էլ կա, բայց վերջնական ձևավորված մեխանիզմը չկա»,- ասաց նա։

Նախարարը նշեց, որ ԵՄ դիտորդները մի քանի առիթներով հանդես եկել են հայտարությամբ, մի քանի առիթով արձանագրել են միջադեպ, բայց ասել են, որ տեղում չենք եղել, ըստ այդմ էլ, եզրակացություն չեն կարող անել։

Մանրամասները` տեսանյութում։