Քաղաքականություն
05.06.2025 | 11:05
Ռուսական բանակը հունիսի լույս 5-ի գիշերն անօդաչու թռչող սարքերով հարվածել է Ուկրաինային։ Չեռնիգովի մարզում զոհվել է հինգ մարդ, այդ թվում՝ մեկ տարեկան երեխա, հայտնում են տեղական իշխանությունները, գրում է Current time-ը։
Խարկովի ուղղությամբ ռուսական ԱԹՍ-ների հարձակման ժամանակ անօդաչու սարքերը բախվել են երկու բնակելի շենքի, վիրավորվել է 13 մարդ, այդ թվում՝ երկու երեխա, Տելեգրամում գրել է Խարկովի քաղաքապետ Իգոր Տերեխովը։
«Դրանք ռազմական օբյեկտներին հարվածներ չեն, սա բնակելի թաղամասերի, Խարկովի սովորական բնակիչների դեմ ուղղված նպատակային ահաբեկչություն է»,- գրել է պաշտոնյան՝ նշելով, որ քաղաքում անօդաչու թռչող սարքերի վեց հարված է եղել, որից երկուսը ուղիղ հարվածներ են եղել բնակելի շենքերին։
Անօդաչու թռչող սարքերից մեկը բախվել է բնակելի շենքի 17-րդ հարկին, մյուսը՝ մեկ այլ բազմաբնակարան շենքի երկրորդ հարկին։ Շենքերի մոտակայքում այրվում են բնակարաններ և մեքենաներ։
Ուկրաինայի Պետական արտակարգ իրավիճակների ծառայության տվյալներով՝ Խարկովում, նախնական տվյալներով, վիրավորվել է 17 մարդ, այդ թվում՝ 4 երեխա։
Չեռնիգովի մարզի Պրիլուկի քաղաքում ռուսական անօդաչու թռչող սարքերի հարձակման հետևանքով զոհվել է հինգ մարդ, այդ թվում՝ մեկ տարեկան երեխա։ Այս մասին հայտնել է մարզային վարչակազմի ղեկավար Վյաչեսլավ Չաուսը։ Նրա խոսքով՝ Պրիլուկին հարձակման է ենթարկվել առնվազն վեց անօդաչու թռչող սարքով։
«Նախնական տեղեկություններ կան հինգ զոհի մասին, այդ թվում՝ երկու կնոջ և մեկ տարեկան երեխայի, նրանք գտնվել են փլատակների տակ»,- նշել է պաշտոնյան՝ հավելելով, որ վեց մարդ վիրավորվել է և հոսպիտալացվել։
Ռուսական կողմը հարվածները դեռևս չի մեկնաբանել։
Թարգմանությունը՝ Էմմա Չոբանյանի
