10.12.2025 | 21:28
Կրոնական ազատությունը Հայաստանում ժողովրդավարության կարևոր բաղադրիչներից է։
Թրամփը հայտնել է, որ հեռախոսազրույց է ունեցել Պուտինի հետ և քննարկել ռուսական օդանավակայանների վրա հարձակումները
Քաղաքականություն
04.06.2025 | 21:27
ԱՄՆ նախագահ Դոնալդ Թրամփը հայտարարել է, որ հեռախոսազրույց զրուցել է Ռուսաստանի նախագահ Վլադիմիր Պուտինի հետ՝ քննարկելու Ուկրաինայի կողմից իրականացված «Սարդոստայն» գործողությունը, որի արդյունքում ոչնչացվել էին ռուսական ռազմավարական ինքնաթիռները։
«Ես հենց նոր ավարտեցի հեռախոսազրույցս Ռուսաստանի նախագահ Վլադիմիր Պուտինի հետ։ Զրույցը տևեց մոտ մեկ ժամ տասնհինգ րոպե։ Մենք քննարկեցինք Ուկրաինայի կողմից Ռուսաստանի ինքնաթիռների վրա հարձակումը, ինչպես նաև երկու կողմերի կողմից իրականացվող տարբեր այլ հարձակումներ։ Դա լավ զրույց էր, բայց ոչ այնպիսին, որը կհանգեցնի անհապաղ խաղաղության»,- նշել է Թրամփը։
Նա հավելել է՝ Պուտինը շատ վճռականորեն ասել է, որ ստիպված կլինի արձագանքել օդանավակայանների վրա վերջերս տեղի ունեցած հարձակմանը։
ԱՄՆ նախագահը հայտնել է, որ քննարկել է նաև Իրանի հարցը։
«Մենք նաև քննարկեցինք Իրանի հարցը և այն փաստը, որ Իրանի միջուկային զենքի վերաբերյալ որոշման ժամանակը սպառվում է, որը պետք է արագ կայացվի։ Ես նախագահ Պուտինին ասացի, որ Իրանը չի կարող միջուկային զենք ունենալ, և այս հարցում, կարծում եմ, մենք համաձայնության եկանք»,- նշել է Թրամփը։
Ըստ ԱՄՆ նախագահի՝ Պուտինն առաջարկել է մասնակցել Իրանի հետ քննարկումներին և, հնարավոր է, օգտակար լինել այս հարցի արագ լուծման համար։
«Իմ կարծիքով՝ Իրանը դանդաղեցնում է այս շատ կարևոր հարցի վերաբերյալ իր որոշումը, և մեզ շատ կարճ ժամանակահատվածում անհրաժեշտ կլինի վերջնական պատասխան»,- հայտարարել է ԱՄՆ նախագահը։
Թարգմանությունը՝ Էմմա Չոբանյանի
