ՌԴ-ն հայտարարել է, թե «Բրյանսկի և Կուրսկի մարզերում կամուրջների պայթյունները Կիևի հրամանով կազմակերպված ահաբեկչություն են»

ՌԴ Քննչական կոմիտեն Բրյանսկի և Կուրսկի մարզերում երկաթուղային ենթակառուցվածքների պայթյունները դասակարգել  է որպես «ահաբեկչություն» (Քրեական օրենսգրքի 205-րդ հոդված), գրում է Meduza-ն։

«Ակնհայտ է, որ ահաբեկիչները, գործելով Կիևի ռեժիմի հրամանով, ամեն ինչ ծրագրել են առավելագույն ճշգրտությամբ, որպեսզի հարյուրավոր խաղաղ բնակիչներ հայտնվեն իրենց հարձակումների թիրախում»,- ասել է Քննչական կոմիտեի ներկայացուցիչ Սվետլանա Պետրենկոն։

Նրա խոսքով՝ հետաքննության ընթացքում «հանցագործության վայրերից առգրավվել են պայթուցիկ սարքերի մասեր, ինչպես նաև այլ իրեղեն ապացույցներ»։

«Ռուսաստանի ԱԴԾ-ի և ՆԳՆ-ի օպերատիվ աջակցությամբ այս անմարդկային հանցագործությունների կազմակերպիչներն ու կատարողները կբացահայտվեն և կենթարկվեն քրեական պատասխանատվության»,- հավելել է Պետրենկոն։

Հիշեցնենք, որ հունիսի լույս 1-ի գիշերը Բրյանսկի մարզի Վիգոնիչսկի շրջանում փլուզվել էր ավտոմոբիլային կամուրջը, երբ դրա տակով անցնում էր Կլիմովից Մոսկվա ուղևորվող ուղևորատար գնացքը։ Յոթ մարդ զոհվել է, 113-ը՝ վիրավորվել։ Կամրջի փլուզման պատճառը, ըստ Բրյանսկի մարզի ղեկավարի, պայթյունն է եղել։

Բացի այդ, հունիսի լույս 1-ի գիշերը Կուրսկի մարզի Ժելեզնոգորսկի շրջանում փլուզվել էր երկաթուղային կամուրջը, որի վրայով շարժվել էր բեռնատար գնացքը։ Միջադեպի հետևանքով վիրավորվել էին մեքենավարը և նրա երկու օգնականները։

Հունիսի 1-ին Քննչական կոմիտեն մամուլի հաղորդագրություն էր տարածել, որում նշվում է, որ պայթյունների հետևանքով Բրյանսկի և Կուրսկի մարզերում կամուրջներ են փլուզվել։ Միաժամանակ, Սվետլանա Պետրենկոն լրագրողներին ասել է, որ գործը քննվում է ահաբեկչական գործողության հոդվածով։ Սակայն ավելի ուշ գերատեսչությունը ջնջել է գրառումը, իսկ նոր տարբերակում այլևս չի հիշատակել «պայթյուններ» բառը։

Թարգմանությունը՝ Էմմա Չոբանյանի