Հուշարձանների պահպանո՞ւմ, թե՞ վտանգ. ով է լվանում Երևանի կենտրոնի արձանները. ՏԵՍԱՆՅՈՒԹ

7 մլն 560 հազար դրամ․ Երևանի քաղաքապետարանի հետ կնքված պայմանագրով հենց այսքան գումար է հատկացվել Երևանի 119 արձանի լվացման  համար, իսկ այդ աշխատանքը կատարելու է «Նաիրա Խաչատրյան Սամվելի» անհատ ձեռնարկատերը, որն արձանների լվացման փորձ չունի։

Այս հարցը մտահոգում է մասնագետներին: Քանդակագործ Գարեգին Դավթյանն ասում է՝ նման գործողություններից առաջ պետք է իմանալ, թե ինչ նյութից է պատրաստված արձանը, և ըստ այդմ ընտրել մաքրման մեթոդը։

Քաղաքապետարանից հետաքրքրվեցինք՝ արդյո՞ք պայմանագրով սահմանված է, թե ինչ նյութերով և ինչ եղանակով պետք լվացվեն արձանները։ Պարզվեց՝ ոչ, քաղաքապետարանը միայն մեր հարցումից հետո է դիմել մատակարարին՝ տեղեկանալու, թե ինչ նյութեր են օգտագործվելու։ Ընկերությունը պատասխանել է, որ հարցում է արել ԿԳՄՍՆ պատմության և մշակույթի հուշարձանների պահպանության վարչություն։ Նշվել է, որ մետաղական արձաններն անհրաժեշտ է լվանալ միայն ջրի շիթով, նույն մոտեցումը պետք է կիրառել քարե արձանների դեպքում, բազալտի պարագայում կիրառելի է մետաղական խոզանակը, տուֆի դեպքում՝ փափուկ խոզանակը, իսկ մասնագիտական խորհուրդներ ստացել են քանդակագործ Տիգրան Արզումանյանից։   

Կենտրոն վարչական շրջանի Կոմունալ տնտեսության բաժնի առաջատար մասնագետ Շոթա Բաբայանը, որը մասնակցում է արձանների լվացման աշխատանքներին, ասում է՝ նախորդ շաբաթ 5 արձան է լվացվել։    

Երևանի քաղաքապետարանի և մատակարարի միջև կնքված պայմանագրի համաձայն՝ Կենտրոն վարչական շրջանի արձանների լվացման աշխատանքներում ներգրավված մասնագետները պետք է համապատասխան համազգեստով լինեն, որը կապահովի նրանց առողջությունն ու անվտանգությունը։ Սակայն Կենտրոն վարչական շրջանից մեզ տրամադրված տեսանյութում աշխատակիցները համազգեստով չեն։ Մայիսի ընթացքում մայրաքաղաքի  119 արձանից 60-ն արդեն իսկ  լվացվել է, աշխատանքները պետք է ավարտվեն մինչև տարեվերջ։  

Հավելենք, որ «Նաիրա Խաչատրյան Սամվելի» Ա/Ձ-ն առաջին անգամ չէ, որ քաղաքապետարանին ծառայություններ է մատուցում։ 2019 թվականին ստեղծված ընկերությունը վերջին երեք տարիներին հիմնականում բնակելի և ոչ բնակելի շենքերի բարեկարգման ծառայությունների շուրջ 17 պայմանագիր է կնքել Երևանի քաղաքապետարանի հետ։ Ընդ որում, դեռևս  մարտին անդրադարձել էինք ընկերության կողմից իրականացված Աջափնյակ վարչական շրջանի բազմաբնակարան շենքերի մուտքերի վերանորոգման աշխատանքներին և արձանագրել, որ վերանորոգումից մեկ տարի չանցած՝ ներկված պատերից շատերն անմխիթար վիճակում էին, ներկն ու ծեփը թափվում էին։ 

Մանրամսները՝ տեսանյութում։

Անի Թամրազյան