Վարչապետը խորհուրդ տվեց հաշմանդամություն ունեցողների առաջ դռները չփակել․ ՏԵՍԱՆՅՈՒԹ

Կառավարության հոկտեմբերի 10-ի նիստում առաջին փոխվարչապետ Արարատ Միրզոյանը Կառավարության համաձայնությանը ներկայացրեց որոշման նախագիծ, որով հաստատվում է այն հիվանդությունների ցանկը, որոնց առկայության դեպքում անձը չի կարող աշխատել որպես հանրային ծառայող, չի կարող նաև մանկավարժի հաստիք զբաղեցնել։

Ըստ որոշման նախագծի՝ այդ հիվանդություններն են՝

1.Օրգանական (ներառյալ սիմպտոմատիկ) հոգեկան խանգարումներ (F00 – F09)
2. Շիզոֆրենիա, շիզոտիպային և զառանցանքային խանգարումներ (F20 – F29)
3. Տրամադրության ( աֆեկտիվ) խանգարումներ (F30 – F39)
4. Սովորույթի և հակումների խանգարումներ (F63)
5. Մտավոր հետամնացություն (F70 – F79)
6. Հոգեկան և վարքային խանգարումներ` հոգեակտիվ նյութերի գործածման հետևանքով (F10- F19)
7. Շնչառական օրգանների տուբերկուլյոզ` հաստատված մանրէաբանորեն կամ հյուսվածքաբանորեն (A15)
8. Էպիլեպսիա (G40)
9. Ականջի հիվանդություններ՝ արտահայտված խլությամբ (H90-95) (դիվանագիտական ծառայության պաշտոնի դեպքում)
10. Տեսողական խանգարումներ` արտահայտված կուրությամբ (H54.0) (դիվանագիտական ծառայության պաշտոնի դեպքում)

Արարատ Միրզոյանը նկատեց, որ ըստ էության, նախկինում հաստատված հիվանդությունների ցանկը վերահաստատվում է, ինչին ի պատասխան վարչապետը առաջարկեց հարցը հանել օրակարգից և այն քննարկել հաշմանդամություն ունեցող քաղաքացիների հետ։ «Մեր նպատակն է ներառել հաշմանադամություն ունեցող քաղաքացիներին, ոչ թե նրանց առաջ դռները փակել»,- ասաց նա։

Կառավարության անդամները պայմանավորվեցին հարցը հանել օրակարգից։

Մանրամասները՝ տեսանյութում։