02.11.2026 | 22:55
«Ադրբեջանում խոսքի ազատությունն ու անկախ քաղաքական գործունեությունը ճնշվում են». ԵԽԽՎ և ԵԱՀԿ ԽՎ ներկայացուցիչներ
Առաջարկում եմ COP17-ը նվիրել Գագիկ Ծառուկյանի սատկած առյուծի հիշատակին․ Ղազարյան․ ՏԵՍԱՆՅՈՒԹ
Քաղաքականություն
12.10.2026 | 12:48
Ազգային ժողովում COP17-ի հետ կապված համաձայնագրի վավերացման քննարկման ընթացքում ընդդիմադիր պատգամավոր Էդգար Ղազարյանը քննադատեց Կառավարությանը՝ COP17 համաժողովի կազմակերպման համար «աննպատակ» միլիոնավոր դոլարների ծախսերի և ընթացակարգային խախտումների համար։
Ղազարյանն առաջարկեց կենսաբազմազանությանը նվիրված COP17 գագաթնաժողովը նվիրել «Գագիկ Ծառուկյանի սատկած առյուծի հիշատակին»՝ ընդգծելով, որ բնապահպանական տարրական խնդիրներ չլուծող Կառավարությունը միլիոնավոր դոլարներ է ծախսում միջազգային համաժողովի վրա։ Նա մատնանշեց «Մերիդիան» ցուցահանդեսային կենտրոնում իրականացվող ծախսերը․ «Միլիոնավոր դոլարներ փող է ծախսված Մերիդիանում ժամանակավոր շինություններ կառուցելու համար․ այսինքն՝ մի քանի միլիոն ծախսում են, մի շաբաթ միջոցառում է լինում, այս ժամանակավոր շինությունները հանում են, այդ մի քանի միլիոն դոլարն էլ գնում-կորում է»։
Ղազարյանը նաև հայտնեց, որ Կառավարությունը միլիոնավոր դոլարների վարկային միջոցներ է վերցնում՝ մի քանի շաբաթում աննպատակ ծախսելու համար։
Անդրադառնալով համաձայնագրի վավերացման իրավական ընթացակարգերին՝ Էդգար Ղազարյանը նշեց, որ 2025 թվականին ստորագրված փաստաթուղթը միայն 2026 թվականի հոկտեմբերին է ներկայացվել Սահմանադրական դատարան։
Ղազարյանի պնդմամբ՝ Կառավարությունը որոշում է ընդունել փաստաթուղթն ուղարկել Ազգային ժողով՝ առանց ՍԴ դրական եզրակացության առկայության․ «Չորս օր է տևել ՍԴ-ում գործը մուտք անելուց ու որոշում կայացնելուց հետո։ Ես ՍԴ-ի աշխատակազմի ղեկավարն եմ եղել․ մեր պրակտիկայում, համենայն դեպս իմ պաշտոնավարման շրջանում, նման բան չկար․ երեք ամիս ժամկետ ունի ՍԴ-ն միջազգային պայմանագրերը քննելու համար»։
Նա եզրափակեց, որ տվյալ պայմանագիրը Սահմանադրությամբ առհասարակ վավերացման ենթակա չէ։
Մանրամասները՝ տեսանյութում։
Եվգենյա Համբարձումյան
