Հյուսիսային Կորեան բալիստիկ հրթիռներ է արձակել Ճապոնական ծովի ուղղությամբ

Հյուսիսային Կորեայի զինվորականները երկուշաբթի առավոտյան երկու հրթիռ են արձակել Ճապոնական ծովի ուղղությամբ:  Հարավային Կորեայի մասնագետների տվյալներով՝ արձակումն իրականացվել է Փհենյանի մերձակայքից, իսկ հրթիռների թռիչքի հեռահարությունը կազմել է շուրջ 900 կմ, գրում է Euronews-ը։

Արձակումներից հետո Հարավային Կորեայի Ազգային անվտանգության գերատեսչությունը հրատապ խորհրդակցություն է անցկացրել երկրի զինված ուժերի պատրաստվածության մակարդակը գնահատելու նպատակով։

Հրթիռների արձակումը հաստատել է նաև Ճապոնիան՝ դրանք բնութագրելով որպես, «ենթադրաբար, բալիստիկ հրթիռներ» և նշելով, որ դրանց մարտագլխիկներն ընկել են Ճապոնիայի տարածքային ջրերից դուրս։

Հոկտեմբերի 3-ին Փհենյանը փորձարկել էր միջին հեռահարության բալիստիկ հրթիռ՝ հայտարարելով, որ դրանում կիրառվում են արհեստական բանականության տեխնոլոգիաներ՝ մանևրելու հնարավորությունները բարելավելու համար։ Մի քանի օր անց Սեուլը հայտնել էր երկրում մշակված գերձայնային  մարտագլխիկի հաջող փորձարկման մասին։ Հրթիռային արագացուցիչների օգնությամբ այն բարձրանում է մթնոլորտի վերին շերտեր, ապա շարժվում դեպի թիրախը։

Հոկտեմբերին Հյուսիսային Կորեան կարճ հեռահարության մի քանի բալիստիկ հրթիռների արձակում է իրականացրել՝ ԱՄՆ նախագահ Դոնալդ Թրամփի՝ արդեն այս տարի Կիմ Չեն Ընի հետ հանդիպելու հնարավորության մասին հայտարարությունից մեկ օր անց։

Թրամփի այս նախաձեռնությունը մտահոգություններ է առաջացրել, որ Վաշինգտոնի դաշնակից Սեուլը կարող է երկրորդական դեր ստանձնել միջուկային խնդրի շուրջ հնարավոր բանակցություններում։

Թարգմանությունը՝ Էմմա Չոբանյանի