Թերմոս՝ 7800 դրամ, բեյջի թել՝ 1240 դրամ, էկո պայուսակ՝ 3432 դրամ․ տրամաբանության մեջ չի տեղավորվում․ ՏԵՍԱՆՅՈՒԹ

COP17 գագաթնաժողովի բրենդային նվերների ձեռքբերման համար Կառավարությունը ծախսել է շուրջ 290 միլիոն դրամ։ Այս մասին իր ելույթում նշեց ընդդիմադիր «Ուժեղ Հայաստան» խմբակցության պատգամավոր Լիանա Մանուկյանը։ Նա ներկայացրեց գնումների պայմանագրերի ուսումնասիրության արդյունքները՝ մատնանշելով ձեռք բերված ապրանքների չհիմնավորված ուռճացված գները։

Մանուկյանի փոխանցմամբ՝ պայմանագրերում բացակայում են ապրանքների տեխնիկական բնութագրիչները։ Պատգամավորի վերլուծությունը ցույց է տվել հետևյալ պատկերը․

Ջրաման-թերմոսներ․ պետությունը ձեռք է բերել 16,500 հատ՝ յուրաքանչյուրը 7,800 դրամով։ Մինչդեռ շուկայում, ըստ նրա, որակյալ թերմոսների մանրածախ գինը տատանվում է 2,000–3,500 դրամի սահմաններում։

«Բրենդային տպագրության ծախսը (1,000 դրամ) ներառյալ՝ առավելագույն արժեքը կկազմեր 4,500 դրամ։

Բեյջի թելեր․ ձեռք է բերվել 19,700 հատ՝ հատը 1,248 դրամով։ Ըստ ուսումնասիրության՝ շուկայում դրանց գինը կազմում է 55 դրամ, իսկ բրենդավորմամբ ամենաբարձր որակի թելը՝ առավելագույնը 600 դրամ։

Էկո պայուսակներ․ ձեռք է բերվել 16,500 հատ՝ 3,432 դրամով, այնինչ արդեն բրենդավորված պայուսակը մանրածախում արժե 3,000 դրամ։

Կրծքանշաններ․ 18,550 հատ ձեռք է բերվել յուրաքանչյուրը 2,340–2,964 դրամով։ Շուկայում ամենաբարձր որակի կրծքանշանների արժեքը 1,800 դրամ է»,-նշեց նա։

Ամփոփելով խոսքը՝ Լիանա Մանուկյանն ասաց, որ ընդամենը մեկ օրում իրականացված շուկայական ուսումնասիրությունը ցույց է տվել, որ տվյալ պայմանագրում հնարավոր էր խնայել 84,984,600 դրամ։

Մանրամասները՝ տեսանյութում։

Եվգենյա Համբարձումյան