24.05.2026 | 01:30
«SOAD-ը Երևանու՞մ». Սերժ Թանկյանը հայտարարել է՝ հուլիսին համերգ չի լինի
Թուրքիայում 56 զինվորական է կալանավորվել 2016թ. հեղաշրջման գործով
Քաղաքականություն
23.05.2025 | 16:44
Ստամբուլի դատախազությունը ուրբաթ հայտարարել է, որ Թուրքիայի զինված ուժերի (TSK) 56 զինծառայող է ձերբակալվել «Գյուլենական խմբավորման»՝ FETÖ-ի (Անկարան այն ճանաչում է ահաբեկչական) հետ կապերի կասկածանքով, փոխանցում է TRT Haber-ը։
Հաղորդվում է, որ FETÖ-ի դեմ Ստամբուլում ու երկրի 35 նահանգներում իրականացված գործողության ընթացքում ձերբակալվել են 63 գործող զինվորականներից 56-ը, որոնց նկատմամբ կալանքի որոշում էր կայացվել։
Ստամբուլի գլխավոր դատախազությունը հայտնել է, որ ձերբակալված կասկածյալներից 4-ը գնդապետներ են, 8-ը՝ փոխգնդապետներ, 12-ը՝ մայորներ, 15-ը՝ կապիտաններ և 24-ը՝ ենթասպաներ/սերժանտներ։ Բոլորը գործող զինվորականներ են։ Նշվում է, որ 8-ը ռազմաօդային ուժերի հրամանատարությունից են, 13-ը՝ ժանդարմերիայի գլխավոր հրամանատարությունից, 36-ը՝ ցամաքային ուժերի հրամանատարությունից, 6-ը՝ ռազմածովային ուժերի հրամանատարությունից։
Ստամբուլի գլխավոր դատախազության տարածած հայտարարության մեջ ասվում է, որ Թուրքիայի զինված ուժերում դեռևս չբացահայտված FETÖ կազմակերպության անդամների թիվը գերազանցում է 2016 թվականի հուլիսի 15-ի հեղաշրջման փորձին մասնակցածներին։
Նշվում է նաև, որ որ «FETÖ-ն դեռևս ամենամեծ սպառնալիքն է որպես ահաբեկչական կազմակերպություն, որը վտանգում է սահմանադրական կարգը և պետության գոյությունը»։
Հավելենք, որ FETO-ի առաջնորդը հայտնի կրոնական քարոզիչ Ֆեթուլլահ Գյուլենն էր, որը մահացել է անցյալ տարի ԱՄՆ-ում։ Թուրքիայի իշխանությունները FETO-ին մեղադրում են 2016 թվականի հուլիսի 15-ին երկրում պետական հեղաշրջման փորձի կազմակերպման մեջ։ Թուրքիայի կառավարությունը Գյուլենի շարժումն «ահաբեկչական» է որակել։ Գյուլենը և նրա հետևորդները կտրականապես հերքել են հեղաշրջմանը կամ ահաբեկչական գործողություններին իրենց մասնակցությունը։
Թարգմանությունը՝ Էմմա Չոբանյանի
