16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
Լավրովը մայիսի 20-21-ն աշխատանքային այց կկատարի ՀՀ․ ՌԴ ԱԳՆ
Քաղաքականություն
19.05.2025 | 14:36
Ռուսաստանի Դաշնության արտաքին գործերի նախարար Սերգեյ Լավրովը մայիսի 20-21-ն աշխատանքային այց կկատարի Երևան։ Այս մասին հայտնում է ՌԴ ԱԳՆ-ն։
Նշվում է, որ նախատեսված են նրա բանակցությունները ՀՀ ԱԳ նախարար Արարատ Միրզոյանի հետ, նաև հանդիպում վարչապետ Նիկոլ Փաշինյանի և նախագահ Վահագն Խաչատուրյանի հետ։
Հաղորդվում է, որ շփումները տեղի կունենան 2024 թվականի հոկտեմբերի 8-ին ամենաբարձր մակարդակով ձեռք բերված պայմանավորվածությունների զարգացման, Արարատ Միրզոյանի՝ հունվարի 21-ին Մոսկվա կատարած այցի արդյունքներով։
Օրակարգում են երկկողմ համագործակցության հարցերի լայն շրջանակ, եվրասիական ինտեգրացիոն միավորումների շրջանակում փոխգործակցությունը, ինչպես նաև միջազգային հարթակներում, առաջին հերթին՝ ՄԱԿ-ում, դիրքորոշումների համաձայնեցումը։ Երկու երկրների արտաքին քաղաքականության գերատեսչությունների ղեկավարները մտքեր կփոխանակեն տարածաշրջանային անվտանգության հարցերի, այդ թվում՝ հայ-ադրբեջանական և հայ-թուրքական հարաբերությունների կարգավորման գործընթացների հեռանկարների վերաբերյալ։ Նախատեսվում է 2025-2026 թվականների միջգերատեսչական խորհրդակցությունների պլանի ստորագրում։
Լավրովը նաև ելույթ կունենա Ռուս-հայկական համալսարանում ռուսական համալսարանների մասնաճյուղերի դասախոսների և ուսանողների, ինչպես նաև փորձագիտական հանրության առջև։
Նա ծաղիկներ կդնի Անհայտ զինվորի գերեզմանի անմար կրակի մոտ, ինչպես նաև ծաղկեպսակ՝ Հայոց ցեղասպանության զոհերի հուշարձանին։
«Մոսկվան հույս ունի, որ այցը կնպաստի Ռուսաստանի և Հայաստանի միջև քաղաքական և միջգերատեսչական երկխոսության ամրապնդմանը, կհանգեցնի փոխըմբռնման աճի և երկու կողմերի համար հետաքրքրություն ներկայացնող հարցերի փոխադարձաբար ընդունելի լուծումների որոնմանը»,- ասվում է ռուսական կողմի հաղորդագրության մեջ։
Թարգմանությունը՝ Էմմա Չոբանյանի
