18.02.2026 | 23:28
Ստեփանծմինդա-Լարս ավտոճանապարհը փակ է
33 մլն դրամ եկամուտ՝ 1 տարում․ ինչ է հայտարարագրել Սրբուհի Գալյանը
16.05.2025 | 20:30
Արդարադատության նախարար Սրբուհի Գալյանը 2024 թվականին 33,8 մլն դրամ եկամուտ է ստացել։ Կոռուպցիայի կանխարգելման հանձնաժողով նրա ներկայացրած հայտարարագրի համաձայն՝ այս գումարի մեծ մասը Դատախազությունից ստացած նրա աշխատավարձն է՝ 25 մլն դրամ, աշխատավարձ է ստացել նաև նախարարությունից (պաշտոնը ստանձնել է 2024-ի նոյեմբերի 5-ին – հեղ․)՝ ևս 3,․1 մլն դրամ, Արդարադատության ակադեմիայից՝ 1 մլն դրամ, Երևանի պետական համալսարանից՝ 390 հազար դրամ, ևս մոտ 2,5 մլն դրամ ստացել է ՊԵԿ-ից՝ հիփոթեքի եկամտահարկի վերադարձ, 716 հազար դրամ այլ եկամուտ՝ «Ակբա բանկ»-ից, 1 մլն դրամ՝ նախկին ամուսնուց՝ Պետրոս Մկրյանից։
Բանկային հաշիվներին նախարարն ունեցել է մոտ 500 հազար դրամ, կանխիկ՝ 2,7 մլն դրամ և 5000 դոլար։ Նա հայտարարագրել է 4,3 մլն դրամ բանկային ավանդ։
Տարվա ընթացքում Գալյանը վարկի մարման նպատակով ծախսել է մոտ 39 մլն դրամ, իսկ տարեվերջի դրությամբ նրա հիփոթեքային վարկի մայր գումարի մնացորդը կազմել է 33 մլն դրամ։ Նախարարը 6,5 մլն դրամ փոխառություն է տվել «Ադրեսս» ՍՊԸ-ին, որը 2 բնակելի համալիրներ է կառուցել Քանաքեռ-Զեյթունում։
Սրբուհի Գալյանի անշարժ գույքը վերջին 1 տարում չի փոփոխվել․ նա հայտարարագրել է 2023 թվականին Մկրյանից նվեր ստացած բնակարան Քանաքեռ-Զեյթունում, հողամաս Նաիրի համայնքում և Դիլիջանում առանձնատուն ու հողամաս։ Ավտոմեքենա, թանկարժեք իրեր, բաժնեմասեր Գալյանը չի հայտարարագրել։
Սրբուհի Գալյանն անկուսակցական է։
Գայանե Խաչատրյան
