08.09.2026 | 18:58
Թրամփն ու Պուտինը մեկժամյա հեռախոսազրույց են ունեցել
ԵՄ-ն հաստատել է Ռուսաստանի դեմ պատժամիջոցների 17-րդ փաթեթը. Թուրքիայի ընկերությունները նույնպես կներառվեն սահմանափակումների ցանկում
Քաղաքականություն
14.05.2025 | 12:48
ԵՄ-ն չորեքշաբթի հաստատել է Ռուսաստանի դեմ պատժամիջոցների նոր փաթեթը՝ խստացնելով նրա «ստվերային» նավթային նավատորմի դեմ միջոցները, մինչդեռ Եվրոպան սպառնում է հետագա պատժամիջոցներով, եթե Մոսկվան չհամաձայնվի Ուկրաինայի հետ զինադադարի, գրում է AFP-ը։
Կրեմլի դեմ նոր միջոցառումները՝ ԵՄ-ի կողմից 2022 թվականին Ռուսաստանի կողմից Ուկրաինա լայնածավալ ներխուժումից ի վեր պատժամիջոցների 17-րդ փաթեթը, մշակվում էին մինչև եվրոպացի առաջնորդների կողմից Մոսկվային իրենց վերջին վերջնագիրը ներկայացնելը ԱՄՆ-ի գլխավորած խաղաղության ջանքերի վերաբերյալ։ ԵՄ 27 անդամ պետությունները ներկայացնող դիվանագետները Բրյուսելում կայացած հանդիպման ժամանակ հաստատել են փաթեթը՝ ըստ դաշինքի լեհական նախագահության։
Փաթեթը ներառում է շուրջ 200 նավթատար լցանավերի ընդգրկվում սև ցուցակում, որոնք օգտագործվում են ռուսական նավթի արտահանման սահմանափակումները շրջանցելու համար։
Ռուսական բանակին ապրանքներ մատակարարելու մեջ մեղադրվող այնպիսի երկրների ընկերություններ, ինչպիսիք են Վիետնամը, Սերբիան և Թուրքիան, նույնպես ենթարկվելու են սահմանափակումների։ Մոտ 2400 անձանց և կազմակերպություններին, որոնց արդեն իսկ վիզայի արգելքներ և ակտիվների սառեցում է սպառնում, կավելացվեն տասնյակ ռուսաստանցի պաշտոնյաներ։ Փաթեթը նաև պատժամիջոցներ է սահմանում ռուս անհատների նկատմամբ՝ Եվրոպայում կիբերհարձակումների, մարդու իրավունքների խախտումների և դիվերսիաների համար։
Պաշտոնյաները խոստովանում են, որ Մոսկվայի դեմ պատժամիջոցների վերջին փուլը համեմատաբար սահմանափակ է նախորդ փաթեթների համեմատ, քանի որ ԵՄ-ի համար ավելի դժվար է համաձայնեցնել թիրախները։
Այս միջոցառումներից բացի՝ ԵՄ առաջնորդները սպառնացել են Ռուսաստանին «մեծածավալ պատժամիջոցներով», եթե Մոսկվան չհամաձայնվի Միացյալ Նահանգների կողմից աջակցվող 30-օրյա հրադադարի առաջարկին։
Գերմանիայի կանցլեր Ֆրիդրիխ Մերցը երեքշաբթի զգուշացրել էր Ռուսաստանին, որ եթե այս շաբաթ Ուկրաինայում խաղաղության հասնելու «իրական առաջընթաց» չլինի, ապա այն կբախվի լրացուցիչ եվրոպական պատժամիջոցների։ Մերցը կոչ է արել Ռուսաստանի նախագահ Վլադիմիր Պուտինին հինգշաբթի Ստամբուլում նախագահ Վլադիմիր Զելենսկիի հետ քննարկել Ուկրաինայի հրադադարը և խաղաղությունը։
ԱՄՆ նախագահ Դոնալդ Թրամփն էլ հայտարարել է, որ կարող է մասնակցել Թուրքիայում կայանալիք բանակցություններին, եթե Պուտինը և Զելենսկին նստեն բանակցությունների սեղանի շուրջ, սակայն մինչ այժմ Կրեմլից որևէ ազդանշան չկա, որ հանդիպմանը կմասնակցի Պուտինը։
Թարգմանությունը՝ Էմմա Չոբանյանի
