29.04.2026 | 09:35
«Տաշիր Պիցցա»-ի աշխատակիցներ են զրկվել աշխատանքից հանրահավաքին մասնակցելուց հրաժարվելու համար․ «Ականատես»
Բրիտանիան Ադրբեջանի «Զանգեզուր» լցանավը ներառել է պատժամիջոցների ցանկում՝ ռուսական նավթ փոխադրելու համար
Քաղաքականություն
13.05.2025 | 21:36
Մեծ Բրիտանիայի կառավարությունը մայիսի 9-ին հայտարարել էր Ռուսաստանի «ստվերային նավատորմի» դեմ պատժամիջոցների ամենամեծ փաթեթի սահմանման մասին։ Պատժամիջոցների ցանկում ավելացվել է 100 լցանավ, որոնք, ըստ բրիտանական իշխանությունների, 2024 թվականի սկզբից ի վեր տեղափոխել են ավելի քան 24 միլիարդ դոլար արժողությամբ բեռ։
Ադրբեջանական լրատվամիջոցների հաղորդմամբ՝«Ռուսական ստվերային նավատորմի» մեջ է մտնում նաև «Զանգեզուր» նավթային լցանավը։
«Զանգեզուր» նավթատարը պատկանում է ASCO-ին («Ադրբեջանի Կասպյան նավագնացության ընկերություն» ՓԲԸ): ASCO-ն այս նավը գնել է Պալմալի հոլդինգից։ Նավը սկզբում անվանվել է «Զարիֆա Ալիևա», ապա՝ «Շահ Դենիզ», և հետո՝ «Զանգեզուր»։ Բացի այդ, պատժամիջոցների են ենթարկվել նաև Ադրբեջանի հինգ քաղաքացիներ՝ Թահիր Գարաևը, Ահմեդ Քերիմովը, Անար Մադաթլին, Թալաթ Սաֆարովը և Էթիբար Էյուբը։ Նշվում է, որ նրանք ներգրավված են ռուսական ստվերային տանկերային նավատորմում՝ Coral Energy Group-ի կառավարման միջոցով։
Մեծ Բրիտանիայի կառավարության պաշտոնական կայքում ադրբեջանական լցանավի մասին նշված է, որ դրա գործունեության նպատակը կամ հետևանքը Ուկրաինայի անկայունացումն է, Ուկրաինայի տարածքային ամբողջականության, ինքնիշխանության կամ անկախության խախտումը կամ սպառնալիքը, կամ Ռուսաստանի կառավարությունից օգուտ քաղելը կամ նրան աջակցելը։ Ընդգծվում է, որ «Զանգեզուր» լցանավը հատուկ նախատեսված է ռուսական ծագում ունեցող նավթի կամ նավթամթերքի՝ Ռուսաստանից երրորդ երկիր փոխադրման համար։
Թարգմանությունը՝ Էմմա Չոբանյանի
