Շռայլ նվեր՝ եղբորը, փոքր եկամուտ և խոշոր վարկային բեռ․ ինչ է հայտարարագրել Կապանի ղեկավարը

Կապան համայնքի ղեկավար Գևորգ Փարսյանը 2024 թ-ին իր եղբորը՝ Գրիգորի Փարսյանին, նվիրել է 10 մլն դրամ արժողության հողամաս Կապանում։

Ընդ որում, ինչպես տեղեկանում ենք Փարսյանի գույքի և եկամուտների հայտարարագրից, նա ունի 10 մլն դրամ և 30 հազար դոլար վարկեր, իսկ 2024-ին ստացել է 4․5 մլն դրամ աշխատավարձ համայնքապետարանից։ Փարսյանն այլ եկամուտ չի հայտարարագրել։

Կապանի ղեկավարի բանկային հաշվի մնացորդը տարեվերջի դրությամբ կազմել է 708 հազար դրամ, կանխիկ ունեցել է 5 մլն դրամ։

Փարսյանն ունի 1 բնակարան Կապանում, որը այլ եղանակով ձեռք է բերել 2018-ի սեպտեմբերի 19-ին՝ համայնքի ղեկավար ընտրվելուց 1 ամիս առաջ։ Նա ունի նաև LEXUS մակնիշի ավտոմեքենա։

Գևորգ Փարսյանի կինը՝ Հասմիկ Նավասարդյանը, բանկային հաշվին ունեցել է 105 հազար դրամ, կանխիկ՝ 300 հազար դրամ։ Նա աշխատում է «Կապանի «Նորոգշին» ընկերությունում և ստացել է 2․4 մլն դրամ աշխատավարձ։ Այս ընկերությունը գրանցված է Գևորգ Փարսյանի հոր՝ Ռազմիկ Փարսյանի անունով։

2024-ի դեկտեմբերին ՔՊ խմբակցության պատգամավոր Վահագն Ալեքսանյանը, հիշեցնենք, հայտարարել էր, որ Կապանում պետական գնումների 70 և ավելի տոկոսը շահում են Փարսյանի ընտանիքի հետ փոխկապակցված կազմակերպությունները։ Այդ ժամանակ  Փարսյանն ինքը հարցազրույցում /news.am/ հայտարարել էր, որ 2024-ի օգոստոսից սկսած՝ մի շարք քրեական վարույթներ են նախաձեռնվել իր ընտանիքին պատկանող մի շարք բիզնեսների մասով, այդ թվում՝ «Կապանի նորոգշին» ՍՊԸ-ի և «Գրիգ բիզնես» ՍՊԸ-ի:

Գայանե Խաչատրյան