29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Առաջիկայում Երկրի վրա կընկնի կես տոննա քաշով խորհրդային միջմոլորակային կայանը՝ «Կոսմոս 482»-ը
Քաղաքականություն
05.05.2025 | 15:17
Առաջիկա օրերին Երկրի վրա կընկնի կես տոննա քաշով խորհրդային միջմոլորակային կայանը՝ «Կոսմոս-482»-ը։ Մասնագետները կարծում են, որ սարքը կարող է հարվածել բնակելի շրջանների։ Խոսքը «Կոսմոս 482» կայանի վայրէջքի մոդուլի մասին է, որը 1972 թվականին արձակվել էր դեպի Վեներա, բայց մնացել էր Երկրի ուղեծրում։
Առայժմ հայտնի չէ, թե կոնկրետ որ օրն այն կընկնի։ Դա սպասվում է մայիսի առաջին կեսին։
Կայանն արձակվել է որպես մեկ այլ կայանի պահեստային տարբերակ՝ «Վեներա 8» ծրագրի շրջանակում, սակայն վթարի է ենթարկվել և մնացել Երկրի ուղեծրում։ Կայանը միջմոլորակային հետագիծ չի մտել բարձրացնող բլոկի հետ կապված վթարի պատճառով, որը դադարեցրել է աշխատանքը նախատեսվածից շուտ։
Շատ դեպքերում տիեզերական սարքերի անկումները մեծ խնդիր չեն դառնում, երբ դրանք այրվում են մթնոլորտում, կամ երբ նման անկումը վերահսկվում է Երկրից։ Սակայն «Կոսմոս 482»-ն անվերահսկելիորեն է ընկնելու և, ամենայն հավանականությամբ, ամբողջությամբ չի քայքայվի մթնոլորտում։
Հրթիռների արձակման վերլուծաբան Գեորգի Տրիշկինը BBC-ի ռուսական ծառայությանն ասել է, որ սարքը նախատեսված էր Վեներայի մթնոլորտ մուտք գործելու համար, ուստի դրա ջերմային վահանը և հերմետիկ խցիկը, ամենայն հավանականությամբ, կդիմանան մթնոլորտ մուտք գործելուն։
Տրիշկինի խոսքով՝ ուղեծրային պարամետրերի վրա հիմնված հաշվարկները ցույց են տալիս, որ բեկորների ընկնելու տարածքը գրեթե ամբողջությամբ գտնվում է ցամաքի վրա, ամենայն հավանականությամբ, Եգիպտոսի, Սիրիայի, Թուրքիայի և Ադրբեջանի տարածքի վրա։ Վտանգ կա, որ մոդուլը կընկնի բնակելի տարածքների մեջ։
Թարգմանությունը՝ Էմմա Չոբանյանի
